Nitish-a fapain JD(U) a zawm ta, dy. CM turin sawi ri nghal

Nitish-a fapain JD(U) a zawm ta, dy. CM turin sawi ri nghal
Bihar Chief Minister Nitish Kumar-a fapa, Nishant Kumar-a chuan Pathianni khan a political zinkawng zawh tanin Patna-ah a pa party, Janata Dal (United) chu a zawm ta a. Deputy chief minister ni nghal tura sawi rik mek a ni.
Party-a a luh chhan hi JD(U) supremo-in Rajya Sabha-a insawna chief minister thutthleng a kalsan hnuah a ni a, tunah chuan BJP tangrual pawlah a tel dawn a ni.
Party member nihna a neih hnuah Nishant-a chuan, “Mi zawng zawng chungah lawmthu ka sawi a, ka chunga rinna min nghah vek hi nunpui ka tum ang a. Kei, Bihar pum pui leh ram pum hian kum 20 kalta chhunga ka pa thil tih kha kan chhuang hle a ni,” a ti.
Politic-a a luh hma hian a pa ang bawka kum 40 vel a niha engineering zir chhuak, Nishant-a hi Bihar atanga Rajya Sabha inthlana JD(U) aiawha ding tura sawi a tam hman hle a; mahse, kum 75 mi, Nitish-a zawk hi ram rorelna in sang zawka lut tura tih a ni a, a fapain JD(U) a zawm ta a. Hei hi kum eng emaw zat politic-a a luh phuttu a pa party worker-te rilru put hmang nen pawha inmil tak niin a lang.
Nishant-a hian party a zawm hma Inrinni khan JD(U) hruaitu hlun leh MLA naupangte chu a hrangin a kawm a. Tlai lamah JD(U) national working president Sanjay Kumar Jha chenna inah party district president-te a kawm leh a. Hetah hian Union Minister Rajiv Ranjan ‘Lalan’ Singh-a pawh a tel a, ani hi JD(U) hruaitu lawk ber zinga mi a ni.
An inkawmnaah hian Nishant-a hian JD(U) hma lam hun tur ruahmanna leh party hotu, Nitish-a’n Rajya Sabha-a a kalsan hnua hma lam pan dan tur a sawipui tih hriat a ni.
Heta telte hian Nishant-a hi pawlah mawhphurhna lian zawk pek a nih tur thu an sawi a. Jha-a chuan, “Eng chanvo nge a neih dawn tih chu party hian a la rel ang a. Pu Nitish-a party a ni a, kum 20 chhung zet a thawh tawhna hnuhma lian tak a keng a ni,” a ti.
“Nitish-a hi Rajya Sabha-ah kal mah se, kum 2030 thleng Bihar sorkar chu a kaihhruaina hnuaiah a thawk chhunzawm zel dawn a ni,” a ti bawk.
Nitish-a nena inhnaih ber nia ngaih, Harnaut bial JD(U) MLA Hari Narayan Singh-a chuan Nitish-a a bân hnua sorkar thar siam turah Nishant chu deputy chief minister atana siam turin thutlukna siam a nih thu a sawi a, hei hi MLA dangte erawh chuan an dik loh thu an sawi thung.
Hetih lai hian MLA Bhagwan Singh Kushwaha chuan Nishant-a hi eng chanvo pawh pek ni dawn se an kian lo thei lo tih a sawi a. “Sorkar siamna tura tan a nih veleh cabinet-ah tute nge lut ang tih leh sorkar bakah party-ah pawh Nishant-a hian eng chanvo nge a neih ang tih ngaihtuah a ni ang,” a ti bawk.
Nishant-a hi deputy chief minister a ni dawn em tih inhnialna a awm mek laiin an state-ah BJP atanga chief minister hmasa ber an awm dawn nia sawi a awm mek bawk.