Daily Newspaper

Nitish Kumar an Pegasus chhuichian ngei duh

8

Bihar Chief Minister leh BJP ally Nitish Kumar chuan opposition tena Pegasus scandal chhuichian an phut chu a thlawp thu a puang. Pegasus spyware hmangin Indian mi langsar 300 chuangte chu enthlakruk nia sawi an ni.

“Heng ang thil hi midangte tihthaih nan leh tihbuai nana hman tur a ni lo. A kimchangin mipui ten an hre tur a ni” tiin Nitish Kumar chuan a sawi.

Thla kalta khan khawvela media house intelkhawm 17 te chuan Pegasus spyware hmanga inenthlakna liantham taka kalpui a nih thu an puang a. Ram hrang hrangah harsatna siam zuiin India ramah pawh sorkar chu Israel firm NSO te siam Pegasus software chu a hmang em tih sawi chiang tura sorkar phutna a lian hle.

Opposition ten parliament monsoon session neih mekah Pegasus chungchang sawiho an ngiat chu sorkar lamin an remti lo va, hei vang hian parliament rorel hleithei lova siam a ni deuh reng bawk.

Sorkar chuan parliament-ah thuchhuah neiin dan kalha inenthlakna engmah kalpui a awm lo a ti thung a. Mahse, tun thlengin House pahnihah sawihona neih a la ni lo.

Bihar Chief Minister Nitish Kumar chuan chhuichianna neih ngei a duh thu sawiin, “Ni tam tak chhung phone ngaihthlak ruk chungchang sawi a ni tawh a, parliament ah pawh sawi chhuah a ni a, news report a awm reng bawk a. Hei vang hian enfiaha chhuichian a, mipui nawlpui hriata tarlan tur a ni” tiin a sawi.

“Engmah thil chiang a awm lo va, tumahin an hrechiang hek lo. Chuvangin enfiahna neih vek hnuah hmalakna kalpui tur a ni ang,” tiin a sawi bawk.

Kar kalta Ningani khan Supreme Court chuan senior journalist pahnih N Ram leh Sashi Kumar te bakah CPM MP John Brittas leh advocate ML Sharma te thu thehluh ngaihtuahna a neihah tunkar chhung hian Pegasus chungchang ngaihtuah a lo remti tawh bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy