Daily Newspaper

Nizung chakna hmanga power plant din hmasa ber hawng

9

ZEDA (Zoram Energy Development Agency) in Tlungvela megawatt 2 pe chhuak thei Grid Connected Solar Photovoltaic (SPV) Power Plant din chu Zirtawpni khan Power & Electricity minister R. Lalzirliana chuan a hawng. He power plant hi Mizorama nizung chakna hmanga kawlphetha siamna power plant hmasa ber a ni.

Minister chuan sawrkarin kawlphetha siamchhuah a ngaihpawimawh thu leh hemi kawnga hmalakna hrang hrang zingah nizung chakna hmanga kawlphetha siamchhuah chu sawrkarin a pawimawhna hriain, Solar Power Policy pawh duan a ni tih a sawi. Nizung hmanga kawlphetha siamchhuahna hmunpui nia sawi – Gujarat, Rajasthan leh India hmun dangte leh Mizoram dinhmun tehkhinin an ni siamchhuah zat angte chu siamchhuah a beisei awm loa, mahse Mizoramin lui khuap thei a nei tha a, chuvangin lui khuapa kawlphetha siamchhuah hi loh theih lohin an ngaihpawimawh thar a tul tih a sawi.

India Solar Map-ah Tlungvel khua a lang ve ta chu lawmawm a tih thu R Lalzirliana hian sawiin, phal taka he project atan ram petu Tlungvel khawtlang leh NGO-te chungah lawmthu a sawi tih sawiin, Vankal-a MW 20 pechhuak thei Solar Power Plant sak hna pawh thawh mek a nih thu leh Saitual daiah MW 5 pe thei pawh din tum mek a nih thu a sawi a ni.

SPV Power Plant Tlungvel sak hna hi 2018 August 13-ah tan niin kumin November 5 khan a enchhinna neih a ni a. He power plant sak nana sum ruahman chu nuai 1400 niin Mizoram sawrkar tum vek a ni. He hnaah hian civil leh general component-ah cheng nuai 213 sen niin solar leh electrical component-ah cheng nuai 1187 sen a ni.

SPV Power Plant hi Tlungvel tlangah bun niin solar module 5340 dah a ni a, kawlphethaa siamchhuah theih tam ber chu Mw 2 a nih avangin 2 MWp tih a ni. 1 MVA inverter pahnih, 1 MVA transformer pahnih, evacuation line 33 KV LILO, SCADA system pakhat chu Power House-ah bun a ni. Solar module hi tlangpharhah bun niin a cable inzamna zawng zawng belhkhawm pawh metre 11632 a thui a ni. Module tihfai nan solar water pump pawh bun a ni a, SPV Power Plant hi ram acre 5 velah bun a ni. Kumtin he plant hian kawlpetha 3 MU (million units) vel a siamchhuah generate beisei a ni a, kum 5 chhungin a enkawl hna hi he Plant buntu Swastik Solar Kolkata-in a ti dawn a ni.

Sawrkar laipui power policy peng pakhat – Renewable Purchase Obligations angin state zawng zawngin an kawlphetha hmanral atanga chhutin za zela engmawzat hetiang renewable – nizung, thli, leh a dangte an hmantel a ngai a, an hman loh chuan sum sengin renewable certificate lei a ngai thin. Mizoramin kawlphetha a hman atanga chhutin za zelah 8.75 hu renewable energy hman a ngai a. Tlungvel Solar Power Plant hian kumtin sawrkar sum nuai 169 vel hum tura chhut a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy