Site icon The Aizawl Post

NMC pawmpui tura inbuatsaih ZMC a hmunah larsap-in a tlawh

NMC pawmpui tura inbuatsaih
ZMC a hmunah larsap-in a tlawh
Mizorama medical college awmchhun, Mizoram University leh National Medical Commission (MCI ni thin) hnuaia thlunzawm college Zoram Medical College (ZMC) Falkawn ami chu Thawhlehni khan larsap Hari Babu Kambhampati chuan a tlawh.
Health & FW principal secretary Esther Lal Ruatkimi, ZMC director Dr John Zohmingthanga, registrar Dr Jane R Ralte leh ZMC hotu dangten lo dawngsawngin, ZMC attached hospital a tlawh hmasa a; ward thenkhat leh operation theatre-te a endik. ZMC hotute hian Academic Block tlawh turin an sawm a. Academic Block-ah hian department hrang hrangten museum an neih te, class room leh hmun pawimawh dang a tlawh a, MBBS 3rd year zirlaite nen an inkawm bawk.
A hmunhma a tlawh hnu hian ZMC hotute nen an inkawm a. ZMC chungchang, hmalakna kal mek leh hmachhawpte powerpoint hmangin ZMC director-in a sawifiah a. Hmachhawp pawimawh an neih zingah NMC atanga recognition hmu tura pawimawh zualte Health principal secretary-in a sawipui bawk.
Larsap chuan Mizoram tana ZMC pawimawhna a hriatthiam thu a sawi a. State sawrkarin NMC pawmpuina hmu tura a ti phuisui zel chu lawmawm a tih thu a sawi. Aizawl pawnlam khaw dang a tlawhnaah doctor indaihlohna a takin a hmu tih sawiin, “Zoram hmun hrang hrangah doctor indaihlohna a nasa a, a bikin hmeichhe lam doctor leh naupang enkawltu doctor indaihlohna a zualkai bik. Thingtlang lama doctor indaihlohna hi ZMC atanga MBBS zir zo an awm hunah a ziaawm a beiseiawm a, a nghahhlelhawm tawh hle,” a ti.
ZMC-in NMC pawmpuina nei tura hmasawnna ruhrel siam kawnga project proposal a siamte chu a theih anga nawrpui a tum tih a sawi a. Heng hmasawnna ruhrel hi a siamna atana sum a hautak deuh avangin public sector undertaking lian deuhte be kual a, CSR sum ngaihven tha a tih thu a sawi a ni.
ZMC department hrang hrang chu hmanraw changkang zawk nena thuamthat a ngaipawimawh tih larsap hian a sawi a. Principal secretary leh ZMC director-te chu department tina HoD-te nen inrawnkhawm a, an hmanraw mamawh chhawpchhuak a, proposal tha tak siam turin thurawn a pe. Ministry lamah thehluh a nih hun theihtawp chhuahin nawrpui a inhuam tih a sawi bawk.
ZMC-a MBBS zirlaite tana thil tangkai tak tur chu Civil Hospital Aizawl-a practical experience neih a ni, tiin, hei hi a taka kalpui a nih theihna’n ZMC chuan CHA nena thawhhona kawng an dap tha a tih pui thu a sawi a ni.

Zoram Medical College ah hian:

# Kumtin MBBS zirna atan seat 100 quota fel taka siam sa behchhan a awm a. Zaa 70 state quota, zaa 15 all India quota (NEET) leh zaa 15 NRI quota atangin zirlaite admission pek thin a ni.

# Tunah hian MBBS zirlai 488 awmin, heng zinga 270 hmeichhia, mipa 218 an ni. MBBS batch hmasa berte chuan intern leh house an zawh hnu ah kum 2024 hian degree neiin an zir zo dawn.

# Zirtirna lama inhnamhnawih 144 leh non-teaching staff 554 awmin, an vaiin thawktu 698 an awm a; thawktute luah mek residential quarters 225 a awm.

# ZMC attached hospital-ah hian ICU khum 38, damlo khum dang 470, major operation theatre (OT) 7 (+3), minor OT 2 (+4) leh casualty khum 20 awmna a awm.

# Bus service tha tak awm tawhin Aizawl leh ZMC chhehvel atang pawhin ZMC hi pan a awlsam tawh hle.

# Oxygen 1500 LPM – PSA a tam siam theihna oxygen plant pathum hmangin a nei a. Natna leh inenkawl dam kawnga zirbingna – reasearch unit pawh pathum – Model Rural Health Research Unit, Viral Residential Diagnosis Lab leh Multi Disciplinary Research Unit a kalpui mek.

Exit mobile version