Hnamdang pasal neih kaihhnawiha sawi hlawh mek Congress candidate Meriam L Hrangchal chu ram tana rohlu leh tangkai tur a nih avanga dah an ni tih Congress president Lalsawta chuan a sawi a. Rahul Gandhi puhna chungchangah ZPM working president K Sapdanga chuan ‘dawtbu’ an lo keu tir a nih a rin thu a sawi.
Nomination a file hnua thuthar thehdarhtuten zawhna chhangin, Congress president Lalsawta chuan, Congress-in candidate atana an duh em em a, mi tangkai tur a ni tih an hriat avangin Meriam L Hrangchal chu candidate-ah an dah tih a sawi a. “Lo engtotu an awm ngei ang tih pawh kan ring a, bial tinah hian Congress hi ding lo vek phei ila chu tam tak hi an lawmin ka ring. Meriam-i chungchang hi kan party chuan kan ngaihtuah uluk a, kan party tan chauh niloin Zoram tana kan rohlu nia kan hriat avangin kan dintir a ni,” a ti.
Congress party chuan hnehna chan a, sawrkar tha siam ngei an tum tih a sawi bawk.
ZPM working president K Sapdanga pawhin thuthar thehdarhtute zawhna chhangin, Pathian leh mipui zarah hlawhtlinga an tan a ring tih sawiin, sawrkar tawhte mipuiin an hrechiang em em a, an ni chuan kalphung thar an zuar, kalphung thar mipui sawrkar chu enchhin an duh niin a sawi. Rahul Gandhi-a’n MNF leh ZPM chu BJP tana kawng hawngtu nia a puh chunchang zawhna chhangin, “Khawi atangin nge a hriat ka hre loa, dawt bu a keu a nih kan ring,” a ti.
November 7-a Mizoram MLA inthlanpui neih turah candidate tur ten nomination an file mek zel a. Ningani bikah khan candidate 94-in nomination paper thehlutin, a hma lama thehlut tawh te nen a vaiin mi 117-in an thehlut tawh. Nomination paper hi vawiin – October 20 chawhnu dar 3.00 ralhma thleng thehluh theih a ni.
Nominatin file-tu 117 awm tawh Meriam-i hi tangkai tur – Lalsawta Rahul-a’n dawtbu keu – Sapdanga
