North Korea chuan ngawi rengin China ramri bul maiah hmun hla tak kap thei missile dahna hmun siamin Kim Jong Un-a’n ralthuam hlauhawm a neih dan nan a hmang a, nuclear hmanga mi beih mai theihna remchangah huang a zauh zel niin think tank pakhatin a sawi.
Sinpung, North Pyongan Province-a missile dahna hi China ramri atanga km 27 chauhva hla niin Center for Strategic and International Studies chuan a sawi a. Khawmualpui dang kap phak missile paruk atanga pakua vel leh a kah chhuahna chetsawnpui thei a awm niin Nilainia an zir chiana an tihchhuah an tar lang.
“Heng missile-te hi Asia khawchhak leh United States tan pawha hlauhawm a ni,” tiin report an siamah an tar lang bawk.
“Tuna chhut lawk theih chinah chuan indo awm hunah heng a kah chhuahna leh missile hi la chhuakin ralthuam an vuah ang a, a hmaa lo ruahman lawk tawh hmun atangin an kap chhuak thei mai dawn a ni,” tiin an tar lang a, report hi thlalem atanga an hmuh atanga an siam a ni tih an sawi bawk.
Missile dahna hmun hi kum 2004 vel atanga sak tan niin kum 2014 vel atanga hman tan niin an tar lang a, tun thlengin a sak hna hi la thawh chhunzawm zel a ni bawk.
South Korean defense ministry chuan North Korea-in nuclear leh missile a khawih vel dan chu an thlithlai reng tih an sawi a, a bak an sawi thui lo thung.
Hetianga missile dahna hmun an nei ru tih puan a nih hma lawk khan Kim-a chuan US leh South Korea-in sipai nunchan an zir avangin nuclear ralthuam siam chu ‘rang zawnga kalpui’ a nih tur thu a puang a. Sipai nunchan zir hi Pyongyang chuan indona hmahruaiah a ngai a ni.
US President Donald Trump-a hian a hun hmasaah khan Kim-a hi vawi thum a hmu a; mahse, Kim-a’n nuclear ralthuam siam a tumna erawh a dang thei lo va. Tuna White House a luah leh hnuah North Korea hian US hnimhnaih a duh tawh rih lo va, Ukraine-a indona kal mekah Russian President Vladimir Putin-a thlawptu a ni.
Kim-a hian kartirah khan ram himna awm chhun chu North Korea hmelmate hlauhva insiam a nih thu a sawi a ni.
North Korea-in a rukin missile dahna a nei?
