Site icon The Aizawl Post

North Korea-in ei leh barah harsatna tawk

North Korea chuan ei leh bar lamah harsatna namen lo a tawk mek tiin mithiamte chuan an sawi a. North Korea ei leh bar lam tlakchhamna hi thil thar a ni lo va, mahse, ramri thunun, khawchin mumal lo leh hrekna avangin tun hnaiah a dinhmun a chhe zual zel tia sawi a ni.
South Korea unification ministry chuan North Korea-a ei leh bar harsatna hi sawifiahin World Food Programme (WFP) te chu tanpuina thawn lut turin a ngen a.
South Korea thuneitu tena Satellite thlalak an tarchhuahah North Korea chuan kum 2021 aiin kum 2022 ah ei leh bar 180,000 tonnes in a tharchhuak tlem zawk an ti.
Nikum June khan WFP chuan khawkheng leh tuilianin thlai tharchhuah tur a khawih pawi nasa an ti a. State media te chuan nikum kha North Korea-in khawkheng a tawn nasat ber dawttu, an ti bawk.
Vaimim man chu kum 2023 kum tirah a hma kum aiin 20% in a a sâng zawk a, vaimim hi buh aia chin tam zawk a ni a, a man pawh a tlawm zawk bawk niin Rimjin-gang, North Korean magazine, Japan-a inbunte chuan an tarlang.
North Korea hi khawvela ram rethei berte zinga mi niin CIA World Factbook te chuan North Korea gross domestic production per capita chu kum 2015 khan $ 1,700 velah an chhutsak a ni.
“North Korea-in Covid len avanga ramri a khar bur avangin pawn lam mite tan thil awm dan enfiah tura luh ngaihna a awm lo,” tiin James Fretwell, NK News analyst chuan a sawi a. North Korea hian January 2020 atang khan ramri a khar phui a. International community atanga humanitarian aid a dawn pawh a tlahniam zel a. UN Office for the Co-ordination of Humanitarian Affairs chuan North Korea chuan nikum khan interntional organisation te atangin tanpuina $ 2.3 million hu an dawng a ti a, kum 2021 kha chuan $ 14 million hu an dawng thung.
Harsatna nasa tak mipui tena an tawk chung hian North Korea chuan nikum khan ballistic missile ringawt pawh 70 chuang kapchhuakin a enchhin thung a, chung zingah chuan international ballistic missiles US mainland kap pha tia a sawi pawh a tel a ni.
North Korea thuneitute chuan a ram mipui tena harsatna an tawh a hriat thu sawiin mahse missile kahchhuah chu a chhunzawm reng tho thung a, Kim family te chuan ralthuam tha neih chu ram dang laka an himna tur awm chhuna an ngaih a ni tlat a ni.
Mithiamte chuan tun ang renga thil a kal a nih chuan North Korea chuan kum 1990 chhova tam tla nasa tak a tawn offical document ah pawh “Ardous March” an tih hial ang chu thleng theia ngaihna a lian hle a, kha tam tla avang khan nunna chan 600,000 chuang an awm a ni.

Exit mobile version