Daily Newspaper

North Korea-in hneh theihloh sipai pawl din tum

26

North Korea leader chuan United States-in hmelma anga a ngaihna kal zelah ‘hneh theihloh sipai pawl’ din a nih tur thu a sawi.

Kim Jong-un chuan ralthuam tha zawk neih tuma hma an lakna chu mahni inven nan a nih thu sawiin indo chawhchhuah nan a ni lo tiin a sawi bawk.

Heng thu te hi Kim chuan defence exhibition neihnaa a sawi niin tun hnaiah North Korea chuan hypersonic leh anti-aircraft missile te a lo enchhin tawh bawk a.

Hetihlai hian South Korea chuan submarine-launched weapon te a enchhin ve bawk.

Pyongyang a Self-Defence 2021 exhibition neihnaa thusawina a neihaah Kim chuan South Korea-in ralthuam lama hma a lakna chungchang sawiin North Korea chuan a thenawm ram nena indo a duh lo tiin a sawi a.

“Tute nen maha indo kan duh lo, indo pumpelh duh zawkin chu mi atan chuan national sovereignty humhim turin hma kan la zawk a ni,” tiin a sawi.

Kim chuan US chu North leh South chotuaha boruak sosang siamah a puh bawk a. North Korea in US chuan hmelma angin a en tih pawm loh rual a ni lo tiin a sawi bawk.

President Joe Biden kaihhruaina hnuaiah US chuan North Korea nena inbiakna neih a duh reng thu a sawi a, mahse, Pyongyang chu hrekna hlih a nih theih nan nuclear weapon neih a tum a bansan hmasa tur a ni a ti a, North Korea chuan chu chu a zawm duh lo a ni.

North Korea hi UN chuan ballistic missile leh nuclear weapon a enchhin a khapsak tlat a. Mahse, UN khapna hi bawhchhe reng thungin hei vang hian nasa zawka hrehbehin a awm mek zel thung.

Thla kalta khan UN atomic agency chuan North Korea chuan nuclear reactor te tinung lehin nuclear weapon siam nan plutonium thlitfim tan leh a tum tiin a lo sawi tawh bawk a.

North Korea thung chuan amah a inven nan ralthuam a siam ngei a ngai tiin a tangkawh ve tlat thung.

Pandemic len hnua North Korea in a ramri tin a khar avangin economy lamah harsatna nasa tak a tawk meka ngaih niin ei leh bar leh fuel te China atanga a chawkluh te pawh a titawp vek a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy