North Korea chuan intercontinental ballistic missile (ICBM) chu a kapchhuak leh ta a, a ralthuam rintlak zia lantir nan midang a barakhaihna tiin state media chuan a tarlang.
Missile hi 900km (560 miles) minute 67 a thlawh hnuah Sea of Japan ah a tla a ni.
Pyongyang chuan an hmelma US leh South Korea te beihlet thei turin theihna a nei tiin a sawi zui bawk.
Thla thar khian Washington leh Seoul te chuan military joint exercise an nei leh dawn a, hei hi North Korea nuclear vauna laka invenna tur inpuahchahna anga ngaih thin a ni a.
Pyongyang cuan huat tak te in military exercise neih hi a haw thung a, North Korea run tura inbuatsaihna anga a ngaih a nih avangin kum tinin military exercise neih dawn apiangin eng emaw tih a nei ngei ngei thin.
Karkalta Pathianni pawh khan North Korean leader Kim Jong-un unaunu Kim Yo-jong pawhin North Korea vauna chu natawka chhan let zel a niang tiin a lo sawi tawh a, US chu North Korea vau zui reng lo turin a ti zui bawk.
Mahse, Kim Yo-jing chuan SOuth Korean capital Seoul chu North Korean missile hmanga beih a ni dawn lo a ti ve thung.
Karkalta Zirtawp khan North Korea chu military parade puitham taka kalpuiin chutah chuan ICBM thahnem tak phochhuahna anei a.
Inrinni a missile a kahchhuah hi kumina missile a kahchhuah leh hmasak ber niin Japan exclusive economic zone (EEZ) bul mai Hokkaido khawthlang lama tuipuiah a tla niin Japanese Prime Minister Fumio Kishida chuan a sawi a.
Nirth Korea missile hi 5,700 km altitude ah a thlawk tiin Japan sorkar thupuangtu Hirokazu Matsuno chuan a sawi a, a thlawk sang viau chungin North Korean missile kahchuah tawh zinga thlawk sang ber ani lo a ti bawk a.
November thlan khan North Korean ICBM chu 6,100km altittude ah lo thlawk tawhin, January 2022 pawh khan North Korea chuan kan chenna Lei vansang atanga a missile kahchhuah atanga lak thlalak nia a sawi te khawvel hriata phochhuahna a lo nei tawh bawk.
ICBMs te hi hmun hlatak kap thei a nih avangin ngaihven a hlawh zual a, North Korea chuan US mainland pawh kap thei ICBM a nei tawh tiin a inchhal bawk. Japan Defence Minister Hamada Yasukazu pawhin karkalta Inrinni a missile kahchuah chuan 14,000 km vel lai a kap pha theia an rin thu a sawi bawk.
“North Korea hian Japan leh international community tena remna leh muanna an neih derthawngin a siam a, pawm theih a ni lo” tiin Matsuno chuan a sawi.
North Korea chetdan chu G7 minister te Germany a summit nei mek te chuan an dem thu an sawi a. Thuchhuah intawm an siamah ‘internartional peace leh security derthawngin a siam’ tia sawiin UN security Council chuan Pyongyang lakah hrekna nasa zawk a kalpui tur a ni an ti zui bawk.
South Korea chuan missile chu North Korea a Sunan district, Pyongyang hmarlam, international airport awmna bul atanga kahchhuak tiin a sawi a. Helai hmun hi North Korea in tun hnaia ICBM test nana a hman ber a ni.
North Korea in ballistic missiole a kahchuah leh nuclear weapons programme a kalpui chu UIN Security Council khap a ni a, mahse, chu chuan Pyongyang hmalakna a thulhtir hauh lo thung a, military parade hmangte in a hmalakna a pholang chamchi zui zawk zel.
=========================
North Korea in ICBM kapchhuak nawn leh ngat
