Thawhtanni khan South Korea sipaite chuan tun thla chhunga a pahnihna atan US tui hnuai indo lawng, nuclear tha chakna hmanga thuam US submarine chuan South Korea tuipui a thlen leh thu thuchhuah an siam a. USS Kentucky-in Busan lawngchawlhna a thlen atanga kar khat hnuah USS Annapolis-in Jeju Island a thlen ve leh thu hi South Korea sipai thupuangtute chuan an sawi a ni.
Tun tuma US Kentucky indo lawng hi kum 1980 hnu lama US-indo lawng nuclear ralthuam hmanga thuam ten South Korea ram an thlen vawi khatna a la ni a. He US Kentucky indo lawng hi North Korea chuan a lo ngaimawh nghal hle a, South Korea lam leh US lawng lam hawi zawnga ralthuam a chelek theihzia lantir nan khawmual dang kahna Ballistic Missile leh Cruise Missile te chu a kap chhuak ve nghal bawk a ni. Heng ralthuamte a kah chhuah lai hian North Korea Defense Minister chuan, US Kentucky awmna lawngchawlh hmun chu North Korea te nuclear ralthuam tlakna hmun tur a nih theih thuin a lo vau ve mek bawk.
Hetih mek lai hian America sipai, Pvt. Travis King-in kar hmasa thawhlehnia ramri a rawn kan chungchangah North Korea chuan ngawih a la chuh rih a. Hei hi US officials te chuan an ngai thutak hle a, Travis King dinhmun dik tak leh a hriselna chungchang te, khawii hmunah nge hren a nih tih leh eng dinhmunah nge a din tih zawhna te hi North Korea chuan a ngaihthah thu thuchhuah an siam a ni. Mi thenkhat chuan Travis King chhuah hi US leh South Korea ten ralthuam a inpuih tawn an chin tihtlem nana North Korea-in hmanruaa a hman niah an ngai a ni.
North Korea vau nan US Indo lawng thawn
