North Korean hruaituin Russia a thlawp thu sawi nawn

North Korean hruaituin Russia a thlawp thu sawi nawn
North Korean hruaitu, Kim Jong Un-a chuan Moscow chu Ukraine-a indonaah ‘tiamchin awm lovin a thlawp’ tih a sawi niin an sorkar chanchinbuin a tar lang.
Russian Foreign Minister Sergei Lavrov-a nen North Korea-a an inkawmnaah Kim-a hian Pyongyang chu ‘Ukrainian buaina ber’ bei tura ‘Russian hruaituten an chet lakna apiang a thlawp’ tih a hrilh a ni.
Khawthlang ram thuneitute chuan nikum khan Pyongyang hian Ukraine-a indonaa Russia pui turin sipai 11,000 an tir niin an lo sawi tawh.
Russian President Vladimir Putin-a hian February, 2022 atang khan Ukraine hi a rûn tan.
North Korean sorkar enkawl, KCNA news agency chuan Kim leh Lavrov te hi Inrinni khan ‘inringtawn tak chungin an indawr’ tih a sawi.
North Korean hruaitu hian ‘Russian sipai leh an mite chuan an ram thatna tur leh a tul anga beihpui an thlaknaah hnehna an chan ngei a beisei thu’ a hrilh bawk.
Telegram-ah Russia-a foreign ministry chuan video dah chhuakin hruaitu pahnihte hi an inchibai a, an inkuah bawk tih a lang.
North Korea-in Russia a thlawp tlat thu a sawi mek lai hian US President Donald Trump-a chuan a chawlhsan zeuh hnuah Ukraine hnenah sipai hmanrua a pe chhunzawm veleh chiah.
Trump-a hian Ningani khan NBC News hnenah Nato nen US-in Ukraine hnenah ram tangrualte kaltlang hian Russia-in van sang atanga a beih nasat thar hle hnuah Patriot air defence system a pe dawn tih a sawi a ni.
Pyongyang hian Russia pui turin sipai a thawn tih hi April khan a vawi khat nan a sawi a, hemi hma daih hian Ukraine leh khawthlang ramte chuan North Korea atangin Russian-Ukrainian ral hmatawngah sipai tam tak an lut tih an lo sawi tawh thung.
Kim-a hian nikum June thla khan Russian hruaitu Putin-a nen inremna siamin an ramin ‘nawrna’ an tawhah tan dun zel an tum a ni.
Sipaia a puih bakah hian North Korea hian Russia-a indona a nasatna, Kursk region tung ding leh turin hnathawk mi tirh luh a tum bawk tih thla hmasa khan Moscow-a security chief-in a lo sawi tawh bawk.