Daily Newspaper

North leh South Korea ten hotline tinung leh ta

38

North leh South Korea-te chuan nikum June thlaa Pyongyang-in a chhutchah communication hotline chu an tharthawh leh ta.

South presidential office chuan ram pahnih hruaitute chuan inrintawnna neiha inlaichinna siamthat an remti tiin a sawi a ni.

April thla atang khan ram pahnih hruaitute chuan lehkha inthawn tawhin hma an la reng tiin Blue House chuan a tarlang bawk.

Hotline hi North Korea chuan ram pahnih tena inbiakna neih an tum a tlawlh hnuah June 2020 khan a titawp a ni.

He mi hnu lawk hian North Korea chuan inter-Korean office ramri bul hnai lawka mi chu a bomb chhe zui a ni.

“Inremna angin ram pahnih hruaitute chuan inter-Korean communication liason line chu July 27 zing dar 10 atanga hawn tur” tiin KCNA news agency pawhin a sawi a. “Ram pahnih hruaitute chuan inkawmngeihna leh inrin tawnna nei tura hmalak an remti a ni” tiin a sawi bawk.

Hawn a nih hnuah ram pahnih official-te chu minute thum inbiakna an nei zui tiin South Korea Ministry of Unification chuan a tarlang a. Ministry chuan Thawhlehni tlai bakah nitin inbiakna neih tum a nih thu a tarlang bawk.

“Kum khat hnuah kan inbe leh theia kan lawm a ni. Korean mipuite tan chanchin lawmawm a nih ngei kan ring” tiin South official-te chuan an sawi bawk.

Ram pahnih inkar hi kum 2018 atang khan a tha chho hle a, South Korean President Moon Jae-in leh North Korea leader Kim Jon-un te chu tum thum lai an inhmu hman nghe nghe a ni.

Mahse, North Korea atanga South Korea-a tlanchhia mi thenkhat tena North lama propaganda an thehdarh hnuah an inkar a chhe zui tan a. Hei bakah hian Kim Jong-un leh US President Donald Trump inbiakna hlawhchhamin a tizualkai bawka ngaih a ni.

South Korea president chuan hotline hi din leh rawt rengin hma a la zui a, a hlawhtling ta a ni. Korean ram pahnihte hi indo ang reng la niin kum 1950-1953 a Korean war kha chinfelin a la awm lo va, inremna siam a la ni lo.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy