Pathianni zan Euro 2024 qualifiers inkhel pakhatah Spain chuan sikhat faiin Norway an hneh a, he result avang hian inkhel hah loin Scotland chuan Spain hnungzuiin Euro 2024 final round an lut chiang ta.
Group A-ah Spain leh Steve Clarke-a team Scotland hian khelh ruka point 15 ve ve neiin, goal difference-a sang zawk La Roja-in table-ah a ler an luah chho.
Norway laka Spain chakan goal awmchhun hi second half an thah fel hnu lawka midfielder Gavi tihluh niin, khelh hnih ve ve la nei chungin Group A atanga tlang ram pahnih a hriat theih ta a ni.
Manchester City superstar striker Erling Haaland hoa beiseina sang tak nena qualifying khel Norway hian game khat chauh khelh tur an neih tawh avangin an tan engti kawng mahin point nga ve vea an phak lo Spain leh Scotland hi umphak ngaihna a awm tawh lo a ni.
Clarke hoa European Cham-pionship khel tur Scotland mipa team tan tun hi kum 1997 hnu lama qualifying group kaltlanga major finals an khelh vawikhatna tur a ni.
Karliamta Ningani khan Scotland hian Seville khawpui atangin tlinna chance an nei a, mahse, qualifiers vawiruk an khelha a vawikhatna atan tlawm a, mualneitu Spain chuan sihnih faiin an hneh.
He result chhia hi tawngbaw mah se an game hmasa pangaa vawinga ngawt an chak avang khan dinhmun tha takah ding zui thoin, Pathianni zanah inkhel hah loin Norwegian-ho laka Spain chak result chu qualifying paltlangna atan a tawk em em a ni!
Euro 2000 an khelh hnu lama major tournament-a la inlan leh ta lo vang vang Norway hian khelh khat hmabak la nei chungin play-off kaltlanga tlinna chance an la nei a, mahse, hei erawh a derthawng tawh hle a, pathumna an nih zui zel a ngaih piahlamah beisei nei zui zel tur chuan Group G atanga Serbia an qualify a ngai dawn!
Match hnih khelh tur an la neihah Scotland hian Georgia luhkhungin, thlathar hian Norway an mikhual dawn a, Scotland nena group winners nih inchuhna vung chho turah inthlahdah thiang an la ni lo ang!
Spain hian an match hnuhnung pahnihah bottom two team an tum dawn a, Cyprus an luhkhung zawh home game-ah Georgia an su zui leh ang.
Tunlai Israel ram buaina avang hian Kosovo leh Israel inkhel tur chu a hun sawnhlat a ni.
Group I lamah khelh riata point 16 hum chungin Romania-in hma an hruai a, khelh sariha point 15 neitu Switzerland chuan dawtin, pathumnaah game ruk atanga point 11 khawl tling ve tawh Israel awmin, an hnuai chiahah game sariha point sarih nei chungin Kosovo chuan palina an luah.
He thu buatsaih lai thleng hian Scotland leh Spain bakah Por-tugal, France, Belgium leh Turkey-te’n nakkum nipui laia khelh tur Euro 2024 khel turin an dinhmun an sawhnghet tawh a; anni bakah hian a thlengtu nih manah Germany chu automatic-in an tlingsa bawk.
Pathianni zan result
Norway 0-1 Spain
Wales 2-1 Croatia
Georgia 4-0 Cyprus
Czech Republic 1-0 Faroe Islands
Switzerland 3-3 Belarus
Turkey 4-0 Latvia
Poland 1-1 Moldova
Romania 4-0 Andorra