Nou Camp kir zana chak chunga La Liga table ler luahkir Barca

Nou Camp kir zana chak chunga
La Liga table ler luahkir Barca
May 2023 hnu lama a vawi khatna atan Barcelona chuan Inrinni zan khan an khelmual cheithar Nou Camp ngei maiah mikhual an thleng leh thei ta a, si li faia Athletic Club sawp chungin La Liga table-ah hma an hruaikir leh ta phawt.
Duhthala an la peih fel loh vanga seat awm thei zawng zawng zat ticket an la siam loh tuara mipui 45,157 chauh pungkhawm hmaah Robert Lewandowski chuan tan atanga minute lina lekah mualneitu team hmahruaina goal khungin, first half hun pekbelha Ferran Torres-a goal khat thawh ve leh nen Catalan team hian half time-ah si hnih faiin hma an hruai phawt.
Second half thah atanga tuibur hmuam da lekah Fermin Lopez chuan Barca goal thumna tilut ve lehin, minute 58-ah Athletic midfielder Oihan Sancet chu Lopez laka a foul avangin hnawhchhuah a ni zui a; mahse, a tam zawk an nih hnuah Barcelona hian goal khat chiah an khungbelh zo a, chu pawh last minute-a Torres-a goal hnihna kha a ni.
Ferran Torres-a goal hnih thun kha stadium thuamthat hmaa kum 15 mi lek ni chunga Nou Camp-a inlan Lamine Yamal-a siamsak ve ve a ni.
Inrinni zana an hnehna sualchhuah leh nen Barca hian khelh 13 atanga point 31 hmuin Real Madrid an nihrualpui a, goal difference-a an san zawk avangin hma an hruai zet a, nizan result tarlan hman lohah Bernabeu club hian Elche muala draw chauh pawh an hmuh chuan an hmelma lianber Catalan-ho hi an phihthla zui leh nghal ang!
Tarlan tawh thin angin, Nou Camp-a mipui thutna tur hmun zau zawk hi khar a la nih avangin Inrinni zanah pawh an home gound thuamthara inkhel en hmasaber nih tum Barca supporter sing chuangin ticket an chang lo!
June 2023 atanga stadium thuamthat hna an thawh hi a tira an ruahman dan chuan nikum November thla khan zo hman tura tih a ni a; an peih fel hunah chuan Spain rama khelmual hmingthang chhungah hian fans 1,05,000 tehreng an leng thei dawn!
Nou Camp an khar chhung khan reigning Spanish champion hian Barcelona khawpuia Montjuic hill an tih hmuna mipui 55,000 dawng Olympic Stadium-ah an home match tam ber an khel.
Himna chungchanga Nou Cam hman phalna an la hmuh mai loh avangin tun season atana an women’s team home Johan Cruyff Stadium-ah match hnih an khel ve bawk a, he stadium hi mipui 6,000 lek lenna a ni thung.