A nawlpuia vote thlak ni – November 7 a vote tla zawng chu za zelah 80.43 a ni a, 2018 inthlana poll day-a vote tla zaa 80.03 aiin a sang hret. Postal ballot leh service vote amite nen belhkhawma vote tla zat hi November 8 tlai dar 6.00 thleng kha chuan hriat theih a la ni lo thung.
Tarlan tawh angin, Mizorama inthlanpui hi boruak muanawm tak hnuaiah harsatna liantham awm loin neih zawh a ni a. Vote thlak zo hnuhnung ber chu Lunglei district Thorang biala Marpara South Polling Station a ni a, zan dar 11.50 velah inthlan buaipuitute an inkhar fel a ni. An ni hi Receiving Centre-a inthlanna hmanrua thlenpui hnuhnung ber an ni nghal bawk a, Nilaini chawhnu dar 1.40 khan an thlenpui a ni.
Mizorama Assembly bial 40-a polling station 1276 ah vote thlak a ni a. November 8 khan Assembly bial tinah an bialtu general observer hoin vote thlak leh a kaihhnawih hi thlirlet a, chinfel ngai awmte chinfel a ni a, hriat theih chinah zirchian zui ngai thil felhlel leh rinhlelhawm awm loin, inthlan buaipuitute leh political party aiawhten an pawm tlang a ni.
November 6 thlenga chhinchhiah danin, home voting leh postal ballot hmanga vote tla 15061 a awm a ni.
9-South Tuipui Assembly bial huamchhunga polling station pahnih – 29/5 Aithur PS (voter 116) leh 29/22 Lungpuitlang PS (voter 106) ah vote nei zawng zawngin vote an thlak vek a ni. Assembly constituency zinga vote tlak thatna ber chu Serchhip district-a 27-Tuikum Assembly bial niin za zelah 87.32 a tla a, district zingah Serchhip district-ah vote tla tha berin zaah 84.75 a tla a ni.
Vote thlak hmaa mock poll neih atanga vote thlak zawhfel thlenga EVM chhia report zat chu Ballot Unit 49, Control Unit 46 leh VVPAT 139 a ni a, khawl chhia hi rang taka thlak nghal zel a ni. Vote thlak zawh hnu hian polling party-ten tihfel ngai an buaipui hnuah District Hqrs-a Receiving Centre an pan nghal a ni.
Vote tlak tawhna EVM (polled EVM) te hi vote thlak zawhah District Headquarters tina strong room siamah venhimna tha tak hnuaiah vote chhiar a nih hma chu dah that a ni dawn.
DISTRICT MIPA % HMEICHHIA % TOTAL %
Mamit 27548 84.12 27311 85.08 54859 84.59
Kolasib 24955 81.57 27691 84.27 52646 82.96
Aizawl 101292 75.45 121176 79.43 222468 77.56
Saitual 22006 79.80 22951 81.66 44957 80.74
Khawzawl 7301 83.79 7125 81.01 14426 82.40
Champhai 22537 80.80 23164 79.02 45701 79.89
Serchhip 22309 84.79 23680 84.71 45989 84.75
Hnahthial 6938 86.45 6747 81.92 13685 84.16
Lunglei 40573 81.72 43201 85.59 83774 83.67
Lawngtlai 36847 80.65 36283 79.30 73130 79.98
Siaha 16518 76.44 17199 75.18 33717 75.79
Total 328824 79.61 356528 81.21 685352 80.43