Sinlung Hills Council chu kumin November 5 hian an inthlang dawn a, vote thlak ni hian chhiar zui nghal a ni.
Mizoram state election commissioner Dr H Lalthlangliana chuan Sinlung Hills Council inthlan hun leh a kaihhnawih hi Ningani khan a puang a. October 10 chawhnu dar 3.00 thleng nomination paper a thehluh theih a, October 11 chawhnu dar 3.00 ah nomination paper endik a ni ang. October 14 chawhnu dar 3.00 thleng inhnuhdawh theih a ni a, October 14 hian candidate-te symbol tihfel a ni ang.
November 5 zing dar 7.00 atanga tlai dar 4.00 thleng vote thlak a ni anga, vote thlak zawhah ballot box hi vote chhiarna tur hmun panpui a ni anga, vote hi chhiar zui nghal a ni ang.
Sinlung Hills Council (SHC) hi district pathum – Aizawl, Saitual leh Kolasib chhungah a inzar pharh a; constituency 12 awmin voter 23789 an awm a, mipa 11875 leh hmeichhia 11914 an awm a, mipa aia hmeichhia tamna hi 39 a ni. SHC inthlan hmasa ber, kum 2019-ah khan voter 20914 awmin, kumina voter punna hi 2875 a ni.
A vaiin polling station 38 a awm a, heng zinga 13 hi critical polling station-a puan niin, ramri bulhnaia a awm vangte a vangte a ni hlawm tih state election commissioner hian a sawi a. Critical polling station-ah hian district magistrate leh superintendent of Police ten inthlan him leh muanawm tak neih theihna turin a bik taka duan ruahmanna an kalpui dawn tih a sawi.
Inthlan hun tur puan a nih rual hian SHC huamchhungah model code of conduct hman tan nghal a ni tih commissioner hian a puang a. Inthlan felfai leh muanawm tak neih theih nan inthlan buaipuitu official-te, political party, media, NGO-te leh SHC chhunga mipui tawiawmna a ngen tih a sawi a ni.
SHC term kal mek hi kumin November 21 hian a tawp dawn a ni.
November 5-ah SHC inthlan
