Daily Newspaper

NSS Day pualin hun hmang

10

September 24 kha National Service Scheme (NSS) din champha vawi 51-na a ni a. Aizawlah chuan Youth Services minister Robert Romawia Royte hoin hman a ni.

Minister chuan NSS volunteer-ten khawtlang leh ram tan thil tha tak tak – thing phun, thisen pek, hnuchham in tlawh, awareness hrang hrang vantlang tan buatsaih, kawngpui leh vantlang hmun pawimawhte an tifai thin chu lawmawm a tih thu a sawi a. Faina chungchangah midangte zirtirtu ni turin NSS volunteer-te chu a chah. Kum hnih chhung a zawna a thlawna thisen pekah hmahruaitu an ni chu lawmawm a tih thu a sawi bawk.

Sports Minister’s Trophy for Voluntary Blood Donation chu Pachhunga University College, Govt. Hrangbana College leh Govt. Aizawl College te hnenah Robert Romawia hian a hlan nghal a. Higher secondary school atangin Baptist HSS Serkawn, Govt. Mizo HSS leh Govt. Chaltlang HSS ten an dawng bawk. He lawmman atan hian sumfai nuai hnih hu thilpek leh citation a kengtel a ni. State Level NSS Award for 2019-2020 chu Lunglei Govt. College NSS programme officer R. Lalrochama leh Synod HSS-a NSS volunteer Lalhmangaihzuala te hnenah an hnathawh that hriatpuinan leh chawimawinan hlan a ni bawk.

NSS Day lawmnaah hian Aizawla NSS unit hrang hrang 30 vel atangin NSS programme officers 50 vel an tel a. Covid-19 leng vangin kumdang anga huapzau zawka hman a ni lo.

He ni hi Mizoram pumah NSS unit hrang hrangten an lawm a. A thenin NSS Day lawm nan thisen an pe, a thenin anmahni institution leh vantlang hmun an tifai. A thenin Fit India Freedom Run an buatsaih a, plantation site-ah te kalin an thing phun sa hmunhma an tifai a ni.

NSS hi 1969 September 24 a din a ni a. A din tirhah chuan university leh state thlanbikah chauh hawn a ni a, university leh state hrang hrangah hawn belh zelin India ram pumah NSS volunteer hi nuai 40 an tling tawh a ni.

Mizoramah chuan Pachhunga University College-ah kum 1972 khan NSS hi din a ni. Hemi hnu hian college hrang hrangah din chhoh zel a ni. Higher secondary a awm hnu ah NSS unit hi HSS-ah pawh din a ni a. Tunah hian Mizoram pumah NSS unit awmna school leh college 90 a awm tawh a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy