NU LEH PA

Hla pakhatah chuan, “In hraileng thinlai a tap e, a duh lai thamam zun ngaiin. Ka tan chuan maw a hlu chuang ngei e, min duhsakna zawng ai pawhin; fam dairial ka chanpui hma hian, dawn chiang ve r’u chun leh zua ten, in hêl lai nun” tih hi a awm a. Eng ka ti nge ka hre lo, ka lo inthlahrung em em zel mai a ni.
A hla pum pui kan ziak hman dawn lo va, a hla kalhmangah hian ngaihzawng a nei a, a nu leh pa ten an duhpui lo tihna a nih hmel a. Ka lo inthlahrunna tak chu ‘ka tan chuan maw a hlu chuang ngei e, min duhsakna zawng ai pawhin’ tih lai tak hi a ni. Tuisik mai a nih lai ata enkawltu, hmangaih leh duat taka chawi liantu, a tana tha lo tur laka veng a, nun kawng dik kawhhmuhtu a nu leh pa aia a ngaihzawng a ngaihlu zawk hi kei, ka ngaihdan a ni ve hauh lo mai. Kan nu leh pate tluka min hmangaihtu hi an awm lo reng reng ringawt mai a ni. Ngaihzawng tih mai mai, ngaihzawn sen loh an tei huai huai, nu leh pa erawh vawi khat chiah kan nei dawn.
Kan hre bel hlei hlui tawhin ka ring a, ‘nu leh pate hi kan lei Pathian an ni e’ tih thu hi. A ni reng lah tak a, Pathianin a ai awha kan hmuh theih Pathian tura a ruat an ni ngei a, an hnenah hian malsawmna leh ànchhia thlengin a awm a ni. Ram leh hnam changkang apiangin an nu leh pate an zah thiam a, an hmangaih a, an thu an ngai pawimawh thin. Kan ngaihsan em em Korea ram khi nu leh pa zah ram, nu leh pa hlau ram an ni. Nu leh pa an zahna mai piah lamah an aia upa tawh phawt chu zah takin an zai ngaiin an awm a, khuanu malsawmna dawngin khawvel huap pawha ram changkang ni phak an ni.
Nu leh pa zah hi Pathian thu, Pathian duh dan a nih miau avangin malsawm dawnna a ni a. Kan naupan ât laiin nu leh pa thu awih a him ber a, nula tlangval kan lo nihin kan kawppui tur chenin nu leh pa duh zawng thlan a him bawk; chhungkaw enkawl kawngah an fin zawk miau avang leh upa zawk, khawvela hun hmang rei tawh zawk an nih avangin an thu zawm a finthlak ber bawk. Lehkha thiam an ni emaw, pawl thum pass pawh ni rawh se, hringnun kal kual dan leh hun leh ni inher dan te, nun awmzia leh tih tur leh tih loh tur thlengin keini aiin an hre fé zawk tih hi ring mai lo va, a pawma kan pawm thlap tur thil niin ka hria. Nang angin computer khawih a thiam lo a ni thei e, nang angin phone hmangin a duh duh a tikual thiam ve lo a ni thei, zah tak leh tha taka hrilh mai tur a ni. Kawng dangah pawh nu leh pate vin taka biak te, an thil hriat thiam loh hrilh a ngaih huna aw ka vin taka nu leh pa be thin kan awm chuan i sim vat ang u, malsawmna leh anchhia kawltu an ni si a.
Pathian zarah dam tein an awm ang a, lo chak lo tial tialin tar an la ni dawn. An kum a upat poh leh an hlu ting mai dawn a, chu chu hriain anmahni enkawl kawngah kan fimkhur a ngai hle. Zah tak leh hmangaih tak chunga kan enkawl an phû a, keini pawhin zah leh duat taka enkawl chu a bata kan bat a ni. Khawvela kan awm chhungin vawi khat chiah nu leh pa kan nei dawn, mual an liam chuan an liam hlen vang vang tawh dawn a, kan hnenah an lo kir tawh ngai dawn lo a ni. Ngaiin thlahlel em em mah ila min dam hlenpui dawn si lo va, chuvangin kan hnena an awm lai hian kan theihtawp chhuaha enkawl that mai hi kan tih theih chu a ni mai. Nu leh pa zah lo an tluang tak tak thei lo va, malsawmna an dawn tur ang pawh dawng thei lovin khuanu hian kal a kham tlat a ni tih hi kan hriat a tha khawp mai.
Nu leh pate zingah hmuh theih Pathian zu rui thin kan awm em? Fate zah hleih theih loh khawpa zu leh ruih theih thila tlân hi a awm ve theih a nia. Kan fa ten min zah se, min hmangaihin duat takin min enkawl se kan duh chuan kan nunin a zir ve a ngai aw…Kan fa ten rawn ti ve lo se kan duh thil chu mahni pawhin ti lo ngam ila, hnâwl ngam ila, kan fate tana entawn tlak nih i tum theuh ang u khai.