Nuar lo turin Home minister-in ngen
Mizoram Commercial Vehicle Union-in lungawi lohna lantir an tum chu ti tlang lo turin Home minister chuan a ngen nawn a. An ti tlang ta a nih chuan taxi bikah intlanchhawk awm loin an tlan thei vek dawn tih a sawi.
Home minister K Sapdanga chuan thuchah tichhuakin, October 23-a Mizoram Commercial Vehicle Union (MCVU) in lungawi loh lantira tlan loh an tum chu sut turin a ngen nawn tih a sawi a. An thulh lo a nih pawhin mipui nunphung a khaihlak lohna turin ruahmanna chi hrang hrang an siam tih a sawi.
MCVU-in nawrh an kaltlangpui a nih chuan, nawrh chhung chu Aizawl khawpuiah lirthei intlanchhawk awm loin taxi – two wheeler leh four wheeler chu service vek phalsak an ni tih a sawi a. MST Bus-te Aizawl khawpui chhungah an service anga, inzata inthenin, zing dar 7.00 atangin Ngaizel leh Zemabawk atangin an tlan dawn tih a sawi.
Transporter pawl dang, nawrh thlawp ve lote chu buaina an tawh lohna turin uluk taka venhimna ruahman sak tum an ni tih Home minister hian a sawi a. Mizoram sawrkarin State Transport Authority (STA) hmanga public service phalna – plying permit a pekte chuan dilnaa STA thupek zawm tura an intiamna ennawn turin an chah a, hming an ziahhnan an intiamna zawm thei lote hnena permit kawltir reng chu a remchang zui kher lo thei tih a sawi a ni.
District tina SP-ten a tam thei ang police duty ruahman tura chahin, a tul angin batallion mite pawh pawt turin a chah bawk.
Nuar lo turin Home minister-in ngen
