Inrinni zingah Washington Wizards laka an tlawm hnuin Denver Nuggets chuan thawhtan zing khan hnehna an chang a, an khingpui Atlanta Hawks chu point 141-111 zetin an sawp. Thawhtan zinga inkhel dangah Golden State Warriors in hnehna an chang ve bawk.
Denver Nuggets hian an khingpui Atlanta Hawks lakah bul an tan tha viau a, quarter khatnaah point 15 zetin an chungnung nghal. |ha chungchuang taka bul an tan hnuin quarter hnihnaah an khel tha chhunzawm a, point 18 zetin an chungnung zui leh a, point 33 zeta hmahruai chungin chawlhlawk an hmang.
Chawlhlawk hnu lamah pawh Hawks an insiamtha thei tak tak chuang lo. Quarter thumnaah khel tha hret mah se point khatin an hnufual zui leh a, an khingpuite nen an inkar an tizim thei lo. Point 34 zeta chungin chungin Nuggets hian quarter hnuhnung ber an hmachhawn a, chak tur zawk a chiang thawkhat viau tawh. A hmahruaina a tam tham tawh em vangin quarter hnuhnung berah an inthlah dul hret a, an that dan ang berin an inlan thei tawh lo. Quarter hnuhnung berah hian point 8 in Hawks chungnung bawk mah se Nuggets hian point 30 zetin hnehna an chang ta tho a ni.
Hawk an hneh tum hian Nuggets player pawimawh Nikola Jokic a chetha lehpek hle a, point 48 zet a thawkchhuak. NBA Most Valuable player ni mek Jokic hian inrinni zinga Wizards an hmachhawn tumin point 56 zet a thawkchhuak a, hei hi NBA match khata point a thawhchhuah tam ber tum a ni nghe nghe. Hawks chak tluang lai an tihtawp tum hian Nuggets tan Michael Porter Jr chuan point 26 a thawkchhuak a, Christian Braun chuan point 17 a thawkchhuak ve bawk.
Thawhtan zinga inkhel dangah Golden State Warriors chuan an khingpui Minnesota Timberwolves chu point 114-106 in an hneh. Quarter hnuhnung berah Warriors hi point 12 zetin an hnufual hman a, tha taka an khingpuite chhangletiin hnehna an chang ta zawk. Timberwolves an hneh tum hian Warriors player pawimawh Stephen Curry chuan point 30 a thawkchhuak. Inkhel dangah an player pawimawh LeBron James tel lova inlan Los Angeles Lakers chuan an khingpui Portland Trail Blazers chu point 107-98 in an hneh ve bawk.
Nuggets in Hawks an sawp
