Nulate nena tan dun kawngah Alcaraz leh Djokovic an hnip!
Alcaraz leh Raducanu inkawp fuh mah mah em?!
Singles main draw tan hmain US Open mixed doubles lo khelh lawk a ni a, tournament organiser-te beisei ang ngeiin kumin New York major tournament-ah chuan mipa leh hmeichhe tandunna inkhelah a hmei-a-pain top singles player an inlan thei ta a, mahse, singles-a tha ber berte hi mixed doubles-ah chuan a fei fei an lo ni hauh lo a, a tanni Thawhlehni khan Carlos Alcaraz leh Novak Djokovic-te chu an kawppui ve vete nen round of 16 paltlang zo lo zawngin an tla fel!
Ruahman lawk angin, ni hnih awh US Open mixed doubles competition hi nizan khan final khelh nghal niin, champion result tarlan hman a nih tak loh avangin result hriat hman chin chin kan lawrkhawm dawn a ni.
Chhuak hmasa lama tarlan tawh ang khan, kumin hian US Open mixed doubles competition khelh dan thar an duangchhuak a, format tharah chuan pair riat inel tura tih niin, pair riatte hi singles ranking leh wild card pariat pekchhuah hmanga remkhawm an ni.
Men’s world number one Jannik Sinner erawh Thawhtanni Cincinnati Open final khel zo thei loa a dam loh avangin mixed doubles atang pawh hian a inhnukdawk a, hmuh tur a awm ve ta lo.
Carlos Alcaraz leh Emma Raducanu
Thawhlehniah Spaniard world number two Alcaraz leh British number one Raducanu tangdun chu round of 16 mixed doubles match pakhatah Jack Draper leh Jessica Pegula inkawp hneh loin 4-2 4-2-in an tlawm.
Raducanu & Alcaraz hi a trophy chawi zawngin khawsa zo ta lo mah se New York mipui thinlungah an tla na hle a, lawm an hlawh a, an khawsak dan leh an inkawp hmelhmang hmuhnawm danah engngemaw mixed doubles pair tih mai piahlam deuh a awm ring an awm tan!
Nia, kumin US Open mixed doubles event hi kum dang ang lo taka danglam a ni a; a chak lote pawh han indawmkun ngawih ngawih zawngin an khawsa hran lo niin a lang a, Arthur Ashe Stadium chhung leh a chhehvel boruak pawh kha ‘party-like atmosphere’ an tih ang deuh kha a ni a, a zangkhai ru hiai a, US dollar maktaduai khat (£740,000) zet inchuhna ang lo takin a hlimawm ru riau!
Britain nula Raducanu leh Spain tlangval Alcaraz inkawp kha an inkawp fuh lutuk mah mah em aw a tih theih a!
Inkuah deuh bik s’u!
Inkhelh banah pawh anni pahnih hi an han inkuah deuh hnap a; chutih laiin Raducanu hian a chipui leh mipa lama Britian number one Jack Draper khan net hrulah kuah nghakin a lo thlir a, kum 22 mi khan kuah ve ta lo chuan a chibai ta lek a; a kawppui Alcaraz a pawm hiam hiam bik khan mi ngaih a titha lo!
Naran taka a chipui Draper a chibai liam puat zawhah Raducanu khan Pegula chu a va kuah leh ta tho lawi a!
Love triangle a ni thei em?!
He boruakah hian Australian pa inthlahdah ve tak thin Nick Kyrgios chuan Draper leh Alcaraz chu Raducanu inchuhah a lo puh ve mek bawk!
“Ka hre bik lo le, love triangle kan tih angte pawh hi a ni mahna. Draper, Alcaraz, Raducanu. Raducanu laka tlatlum zawk nih an inchuh a nih ka ring,” tiin talkSport a hrilh leh hmiah!
Kyrgios chuan sawizawmin, “Tennis khawvel hian love story hi a lawm ve a, han try chhin ve leh mite han suihzawm hi nuam kan tih zawng tak a ni,” a ti.
Kumin June thlaa an tandun hnu khan Draper hian tunhnai deuh khan fiamthu thawh zauhin, a chipui British No 1 ve bawk a chan tak loh thu a tarlang, chutih rualin Spaniard nena an inkawp chungchangah a dem loh thu leh tun dinhmunah Alcaraz chu Sinner nena khawvela player tha ber an nih avangin a chipui nu pawhin Carlos nena han tandun vel chu nuam ti hle tura a ngaih thu a sawi a, a rin lawk ang ngeiin an tui dun mah mah em aw a tih theih!
Tualchhung player Pegula awm ve reng mah se Flushing Meadows mipuite reng reng pawh khan winning aiin losing pair lam kha an lawmin, an ngaihven zawk a; Alcaraz pawh kha Thawhtanni Cincinnati Open-a a champion tum ai pawh khan British nula nena an tlawm tum hian a hlim mah zawk emaw tih mai tur a ni!
Inkhel en man kha USD 25 (£18.50) atanga USD 145 (£107) inkar niin, ni hnih chauh awh competition tawi a nih angin British doubles player Jamie Murray phei chuan ‘glorified exhibition’ tiin a sawi hial a; big screen lamah on-court DJ hmangin rimawi lam ngaithhlak leh thlir tur a awm bawk a, an lam pah mup mup a ni ber!
Alcaraz leh Raducanu-te pawh an nui sen sen reng a, doubles specialist hmachhawn an nih bawk avangin an result lam chu a ropui ta vak lo a nih kha!
He mite pahnih mak taka inkawp nawlh pawh hian tennis circle-ah chuan sawi zui a hlawh hrim hrim.
Engnge an sawi?
An chak loh hnuah Raducanu chuan a partner fakin, “Pa duhawm zet leh hlim thei tak, hlutna thuk tak nei a ni. Ka hriatna pawh kum a kal ve nual tawh a, Wimbledon 2021 kha ka hriat tanna niin, ka inkhelh hma niin a khel thei hle a, a chak lai ka hmuhin chak ve turin phurna min pe a; kha mi kum tournament kan paltlang hnuah US Open a lo ni leh a, kan inbepawp ve reng a, a hlimawm khawp mai,” a ti.
Alcaraz pawhin fiamthuin bul a tan ve a; khelmual chhungah chuan Raducanu chu a ‘boss’ a nih thu sawi chungin a game style a fak bawk.
Midang dinhmun
American Pegula kha women’s doubles-ah chuan world number one pawh ni thei ngat tawh niin, Draper erawh tour-level doubles-a tawnhriat ngah a ni lo a; a tirah tak phei chuan Pegula nena inkawp tum pawh an ni lo a, ruahman lawk hmasa anga a dinpui tur Zheng Qinwen a inhnukdawk a, chutah Paula Badosa nen hmehbel lehin, ani pawh hliam avangin a in withdraw ve leh a, doubles world No 1. hlui Pegula hi a chang ta a ni.
Pegula leh Draper tangdun hian quarter-final-ah Mirra Andreeva leh Daniil Medvedev inkawp chu 4-1, 4-1-a hneh lehin last four an lut a, 2022 singles champion Iga Swiatek leh Casper Ruudhe thawkdun hnehin final an chuangkai zo em tih chu nizan lam thil thleng a nih tak avangin tarlan hman a ni ta rih lo.
Russian pair hi 24-time major singles champion Novak Djokovic leh a chipui Serb Olga Danilovic tangdun hnehtute kha an ni nghe nghe.
Reigning mixed doubles champions Sara Errani leh Andrea Vavussori tangdun pawhin an title kawl lai humhim turin he thu buatsaih lai thleng hian semi-final an lut tawh tih chin tarlan theih a ni.
Round of 16-ah Italian pair Errani leh Vavussori hian 4-2, 4-2-in big-name pairing an tih mai 2022 Wimbledon singles winner Elena Rybakina leh 2024 US Open singles finalist Taylor Fritz an vaw tla phawt a; qurarter-final lamah 4-1 5-4 (7-4)-a Karolina Muchova leh Andrey Rublev inkawp hneh lehin semi-final an thleng a, American pair Danielle Collins leh Christian Harrison laka an result erawh tarlan hman a ni ta lo.
Midang thei lo aia last minute-a an hnawhluh Collins leh Harrison tangdun hian 4-1, 5-4(2)-a an chipui American pair ve bawk Ben Shelton leh Taylor Townsend hnehin ani semi-final an luh ni.
Six-time Grand Slam singles champion Iga Swiatek leh a kawppui three-time major finalist ni ve ngat Casper Ruud tangdun chuan an bultanna last 16-ah 4-1, 4-2-in, American duo Madison Keys leh Frances Tiafoe 4-1, 4-2 an paltlang phawt a; quarter-final lamah Grand Slam doubles finalist Caty McNally leh a partner Lorenzo Musetti chu 4-1, 4-2-in an thehchhuak leh a; semi-final match-a top-seeded team of American Jessica Pegula leh Briton Jack Draper inkawp an hneh ta zel em tih tarlan hman a ni lo.
Kumin hian US Open women’s singles lama lo vul ve tawh Venus Williams kha kum 45 mi ni tawh chungin mixed doubles-ah hian a rawn inlan ve leh hlawl a; a kawppui leh a chipui ni bawk Reilly Opelka nen round of 16-ah Andrey Rublev leh Czech Karolina Muchova hneh loin an tla.
Nulate nena tan dun kawngah Alcaraz leh Djokovic an hnip! Alcaraz leh Raducanu inkawp fuh mah mah em?!
