Daily Newspaper

Nupa kut tawrhna National Commission for Women-ah thlen

8

Mizorama haw tur, Assam Police leh mipui kut tuar leh an lirthei tihchhiat sak an nih chungchang chu Mizoram State Commission for Women chuan National Commission for Women Delhi-ah a thlen.

Mizoram State Commission for Women (MSCW) in a thlen danin, 2021 July 26 chawhnu dar 1.30 khan John Vanlalzawna leh a nupui Lalsangpuii (28) ten Silchar atanga Mizoram an panna kawngah Assam police leh mipuiin an lo sawisa a, hliam nasa tak an tuar a. Hemi ni hian engmah thu thang hlauh tur leh ramri chungchangah buaina sosang a awm tih pawh hre loin Silchar atangin Vairengte an pan a. Silchar atanga Mizoram panna kawngah ramri avanga buaina chinah Assam police leh mipuiten lo tidingin an lirthei atangin an pawtchhuak a, an lirthei an tihchhiat hnuin an kaltir leh a ni.

Hemi hnu reiloteah hian hmun pakhatah Assam police leh mipuiin lo tiding lehin an lirthei atangin an hnukchhuak a, hmeichhia pawh sawi loin an nupa hian kut an thlak a, an lirthei pawh an tichhe nasa hle a ni. John Vanlalzawna nikhaw hre loa an awm hnu-ah pawh a nupui Lalsangpuii, hmeichhe awm nem, mahni pawh inveng thei lo tur chu Assam police leh mipuite chuan an pawt a, an hnuk a, an sawisak mai bakah anchhia te lawhin chil an chhak khum a ni, tiin a thlen.

Hetianga sawisak an nih lai hian CRPF-te rawn tlazepin an nunna an chhan ta a. Lalsangpuii hian taksaa nasa taka hliam a tuar bakah rilru lamah nasa takin hliam a tuar a ni, tiin, John Vanlalzawna te nupa-in buaina an tawh hun lai hi Assam leh Mizoram an innawr hma a nih thu leh, hetianga buaina an tawh hun hi chawhnu Dar 1:30 vel a nih thu a thlen bawk.

‘Hemi chungchanga Lalsangpuii tawrhna hi Mizoram State Commission for Women chuan a la thutak hle a. Assam police leh mipui chet dan chu a dem takzet a ni. MSCW chuan Assam State Commission for Women hnenah lehkha thawnin, tun hnuah Assam Police leh mipuiten hmeichhe chunga hleilenna an thlentir tawh loh nan a tul anga an mi leh sate an lo thunun ngei MSCW chuan a beisei thu a thlen a. He thil thleng hi National Commission for Women, Delhi a hriattir nghal bawk a ni,’ MSWC thuchhuak chuan a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy