Nupui/pasal then hnua ngaihzawng neih leh
Kawppui te nena inthen hnuah chuan ngaihzawng nei leh tura bul han tan thar leh hi eng emawti taka laih deuh tut hi awm ve thei tak a ni a, chutihrualin chetsual palh pawh awl tak a ni. Inthen hnuah phuba lakna ang reng emaw, inthik tir tum vang emawa midang zawn hmanhmawh leh lutuk te hi chuan kan tana mitha lo tawn a tiawlsam riau tih hriat a pawimawh a, chutiang chuan natna belhchhahin, nat lehzualna min thlen thin zawk a ni. Chuvangin, kawppui te nena inthen hnuah, ngaihzawng nei thar leh turte tana hriattur pawimawh ni a relationship lama mithiam te sawi kan rawn tarlang e.
1. Hmanhmawh suh. Hei hi hriat reng a pawimawh. Kawppui te nen kan inthen hian midang kawp tur zawn leh chûk chûk hi thil awm ve thei a ni a, a chhan hrang hrang a awm thei a, kan lunglen leh khawhar vang a ni thei a, phuba lak duhna rilru leh inthiktir tumna vang te pawh a ni thei. A engapawh chu ni se hmanhmawh vut vut loh a pawimawh ber. I tawn hmasak apiang kha lo ‘ok’ nghal mai loh tur a ni a, hetiang hunah hian kan tana mi tha lo tawn fuh palh a awl hle a, chuvangin kan natna min belhchhah mai maitu tur kan kawp leh palh a hlauhawm tlat.
2. An tunlai inngaihzawnna tawngkam tualleng te pawh hriat loh ve theih tak mai a ni a, chuvangin hetiang lama ngaihtuahna tihzauh ve hmasak te pawh a pawimawh. Inngaihzawnna tawngkam tualleng kan lo ngaihven lo rei tawh a, chuvangin hetiang hunah hian talbuai ve theih tak a ni a, tawngkam hriatthiam loh vanga chetchhiat te pawh awm thei a ni.
3. A bik takin social media lama kan mitawn te chu ‘fake’ an ni em tih te hriatchian a pawimawh. Tunlaiah social media kaltlanga intawng sawi tur an tam tawh a, chutih rualin tisual tak tak pawh sawi tur an awm nual tho ang. Social media kaltlanga kan mi tawn te chu a tak ramah eng ang mi nge an nih tih te hriatchian tum hmasak tur a ni.
4. Relationship counsellor te chuan kawppui then hlim ten ngaihzawng dang an melh lehin an kawppui then tak te ang deuh an zawng rilru duh hle niin an sawi a, an mizia emaw, pianzia emaw, chetdan leh hmelah emaw, eng emawti kawnga an kawppui thentak te nena inanna nei deuh te an melh duh hle a, hei hi tih loh tur a ni. I kawppui then tak laka mi hrang hlauh kha zawng zawk rawh.
5. Kawppui te nena inthen hlima phuba lakna ang deuh a ngai a ngaihzawng neih leh thuai tum hi tih loh tawp chi a ni. Hetiang ti te hian an tisual duh hle. Hei bakah hian kan lunglen khawhar leh rilruna min chhawk tura hlimna zawng a, ngaihzawng dang melh lehnghal thuai te pawh a fuh chuang lo. Inthen hlimah eng emawti chhung han ‘cool’ deuh te chu thil pangngai a ni tih hriat tur a ni a, ngaihzawng neih leh nghal thuai khan hlimna a thlen tak tak chuang lo a, tihsual palh chuan nat lehzualna mai a ni.
6. Inngaihzawn a, han inrim vel te hi a hlimawm ve riau a, mithar kan tawng a, thil thar kan tem a, thu thar kan nei a, kan rilru pawh a lo zangkhai deuh a, chutiang hunah chuan phur over nghal tur a ni lo a, inneih nupui/pasal neih leh thuai thuai lam ngaihtuah nghal chûk chûk tur a ni lo.
Nupui/pasal \hen hnua ngaihzawng neih leh
