Nupui thihnaa rinhlelh a pasal
a court laiin NGO pungkhawm
Kumin January 22-a an veng nu Lalnuniangi (46) an thlam Lengte rama a ruang chhar a nih chungchangah a pasal Lalmawia Kaipeng chu pawikhawihtua rinhlelh a ni a; Ningani – February 19 khan court-ah a inlan a, hemi denchhen hian Ramhlun Sports Complex All NGO Committee chuan na taka hrem phutin court tualah an pungkhawm.
All NGO Committee hian thuchhuah siamin, an veng nu Lalnuniangi, rawng taka thattua puh, a pasal Lalmawia Kaipeng chu dan hnuaiah a na thei ang bera hrem an phut tih sawiin, a chungchang rel a nih lai hian bail-a chhuah lo turin thuneitute an ngen tih an sawi.
Lalmawia Kaipeng chu Ramhlun Sports Complex vengchhung rap tawh lo turin an hriattir a. A rap leh a nih chuan a chungah eng pawh thleng se mawh an phur loang, tih an sawi.
Pi Lalnuniangi’n rorelna dik a hmuh theihnan theihtawp an chhuah zel dawn tih an sawi a. Thuneitu leh hma latute tha tihchak kawngah tih theih an neih chuan an inhawng reng tih an sawi a ni.
‘Ramhlun Sports Complex mipui chuan Pi Lalnuniangi case kal lai hi a tawp thlengin kan thlir zui reng dawn a. Rorelna dik leh fel tak a awm theihnan hma kan la zel ang,’ an ti bawk.
Nupui thihnaa rinhlelh a pasal a court laiin NGO pungkhawm
