India ram state pangaa inthlan laia obsserver hrang hrang ruat zingah chhan engemaw avanga Election Commission-in a chawlhtir mi pathum an awm tawh a, Mizorama duty tura ruat expenditure observer pakhat a tel.
November 7-a Mizorama vote thlak a nih hma atanga candidate leh political party te sum hman dan endik tura ECI-in a ruat, Lunglei South, Thorang leh West Tuipui bial vil tura tih Gaurav Awasthi, IRS chu election official-te bakah candidate-te election agent-te a tawngkhum dan leh zah pah nei lo taka a chet danah a huhoin district election officer hnenah complaint an thehlut a, DEO hian ECI hnenah hlanchhawng ve lehin, a duty atang hian chawlhtir a ni ta a ni.
A ruala midang pahnih chawlhtir hi IAS officer, general observer ve ve, Madhya Pradesh leh Chhattisgarh a duty an ni a. An ni hi chu ECI ruahman angin IAS officer dangten an thlak nghal.
Chawlhtir an nih chhan hi chet dan mawi lo leh observer’s code of ethic kalh tia sawi niin, Commission hian hei hi an service bu ah pawh ziaklang turin a ti a ni.
Observer chawlhtir zingah Mizorama observer a tel
