Lok Sabha inthlanpui neih tura expenditure observer Arvind Sharma, IRAS leh police observer K Satyanarayana, IPS te chuan Nilaini khan Kolasib tlawhin inthlan kalpuina atana inpuahchahna an endik. Nodal officer, asst. expenditure observer, Video Viewing Team, Video Surveillance Team, Flying Squad-te nen an inkawm bawk.
Expenditure observer chuan Mizoram chu state ralmuang tak a nih angin inthlan felfai leh thianghlim kalpui a nih ngei a beisei tih a sawi a. Chutih rualin Election Commission of India-in inthlan kalpuina tura inkaihhruaina a duan chu uluk taka chhiar tur leh mawhphurhna awmte tha taka hlenchhuak turin a chah. Candidate-ten intluktlang taka vote an zawn theih nan ECI-in sum hman theih zat a bituk tih sawiin, assistant expenditure observer leh team hrang hrang chuan inthlan hma chu campaign-na uluk taka an vil a ngai tih a sawi a ni.
Police observer chuan inthlan kalpui chhunga harsatna awm thei zawng zawng uluk taka zirchiang tur leh chu’ng harsatna awm theite chinfel zung zung a nih theih nan ruahmanna felfai tak siam turin team hrang hrangte a chah a. Inbiakpawhna leh inkalpawhna chungchanga harsatna awm thei, ruihtheih thil chevel thlithlai leh silai leh puakthei thil khuahkhirhna kalpui dante sawi ho a ni.
Observer-ten Kolasib an tlawh
