Officer thar turte service rivalry
chhawmlut lo turin CM-in a fuih
Civil Services Combined competitive exam-a tling officer thar turte chu an inkarah inertawnna tha lo chhawm lut ve lo turin chief minister-in a chah.
Mizoram Civil Services Combined competitive exam-a tling, Administrative Training Institute-a combined foundation course kal mek MCS, MFAS leh MIS officer-te chuan Nilaini khan chief minister Lalduhoma an kawm a. Officer tharte chu an hna hi Pathian-in an rawngbawlna tura a pek a ni a. Phur tak leh rinawm taka thawk turin a chah. Service hrang hrang a huhoa an training chu lawmawm tiin, hei hian an zingah innelna leh inhriatthiamna thuk tak a siam dawn a, ramin a hlawkpui dawn tih a sawi a ni.
“Reilote chhungin Mizoramah service rivalry a nasa lutuk tih ka hmu a, he inelna tha lo hi tih bo kan duh a, nangni hi chuan rawn chhawmlut ve suh u,” a ti. An rilru chak vanglai a la nih avangin UPSC lam pawh la exam zel thei se a duhpui tih a sawi a. Central service lama kan tling hleithei lo chu rualawh a nain kan mamawh em em tih a sawi a ni.
Officer-ten an hnuaia thawk, staff hniam zawkte hamthatna ngaihsak se a duh tih chief minister hian sawi a. Staff hniam lama indaih lohna nasa lutuk tihziaawm tul an tih thu pawh a sawi.
“Sawrkar hnathawk chuan mipuiin ram rorelna an pek apiang tha tak leh rinawm takin thlawp ila, hmasawnna hnathawh a chakin a kaltluang thin. Chutihrualin, tuten emaw ruling mi leh sa an nihna changchawia thil dik lo tih tir che u an tum a nih chuan hlau suh u. Kan hum ang che u,” a ti.
Officer thar turte service rivalry chhawmlut lo turin CM-in a fuih
