Daily Newspaper

Oil man tihniam turin ngenna thlen

13

Petrol leh diesel man sang chungchangah Congress party chuan India ram pumah sawrkar thuneitute hnenah tihniam tura ngenna an siam a. Hemi ang hian Mizoram Pradesh Congress Committee pawhin Aizawl district bawrhsap hnenah oil man tihniam tura ngenna hi an thehlut. All India Congress Committee (AICC) ruahmannain India President hnenah petrol leh diesel man sang zel tihniam tura ngenna an ziak a. Hemi ang hian MPCC pawh hian ngenna hi a siam. ‘India ramin sum harsatna nasa tak a tawh mek laiin, sawrkar laipui BJP kaihhruai chuan petrol leh diesel man nasa takin a tisang chho a. Kum 2014-a BJP-in sawrkarna an siam tan tirh khan petrol litre khatah excise duty (chhiah) Rs. 9.20 lak a ni a, diesel litre khat zelah Rs. 3.46 a ni. BJP sawrkar chuan nasa taka tisang zelin kum 6 a liam meuh chuan excise duty pawh litre khat zelah petrolah Rs. 23.78 leh diesel-ah Rs. 28.73 a ni tawh a. Diesel-ah 820% leh petrol-ah 258% in an tisang tihna a ni. Kum 6 chhung hian petrol leh diesel atang ringawta Modi-a sawrkarin chhiah a lakkhawm hi cheng vaibelchhe nuai 18 a ni tawh,’ a ti. Covid-19 vangin khawvel puma oil thlit fim loh, crude oil man nasa taka a tlahniam chungin BJP sawrkar chuan petrol leh diesel man tihhniam a tum chuang lo nia sawiin MPCC chuan, ‘2020 June 24 khan oil thlitfim loh, crude oil hi barrel khatah US dollar 43.41 (Rs. 3288.71) a ni a, barrel 1-ah litre 159 awmin crude oil litre khat man Rs. 20.68 man tihna a ni. Heti chung hian India rama diesel man chu Rs 80 a kai tho a ni,’ a ti. Khawvel pumah crude oil man nasa taka a tlahniam chunga central BJP sawrkarin petrol leh diesel man a tisang lui zel chu mipui rawkna diktak a ni tih a sawi a. Mizoramah pawh BJP-in NDA huanga a thawhpui MNF a sawrkar vangin thil man sang vanga harsatna hi kan tawk nasa hle tih a tarlang. ‘Thla thum chuang Covid-19 vanga total lockdown kalpui chhungin mipui sum lakluh nasa takin a tlahniam a, thil man erawh nasa takin a sang thung. Sa man phei chu nasa takin a sang a, mipuiin harsatna kan tawk nasa hle. Hetihlai hian MNF sawrkar chuan thil man sang lutuk control turin hmalakna pakhatmah a nei lo a, mipuiin kan tuar tlawk tlawk a. Sawrkarin thil man sang control tura hmalakna a neih miah loh laiin LLTF/VLTF thenkhat chuan anmahni area-ah thil man sang lutuk tur nasa takin an control thei thung,’ tiin, hei hian MNF sawrkar chak loh zia a tarlang chiang niin a tarlang bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy