Daily Newspaper

Oil Palm leh Mizoram….

21

Khawvela Oil Palm ching hmasa ber Indonesia chuan kum 110 kaltaah khan bul an lo tan tawh a, Oil palm atang hian sum an la lut nasa hle a, an ramin an thatpui viau awm e; khawvela Oil Palm tharchhuak hnem ber an ni nghe nghe.

Indonesia hian an ram zau zawng square km maktaduai 8.3 atanga sqkm nuai 1.4 -ah Oil Palm hi an ching a. Hun a lo kal zel a, Oil Palm plantation chuan environment a tihchhiat nasat tak em avangin kum 2018 atang khan an bansan (Ban) ta hial a ni.

Mi ramin an thatpui chu tiin tunah hian tlaikhawhnuah kan han tharthawh ve leh hnuhnawh a, thatpuina mual mual te chu a awm ve bawk mahna. Hetih rual hian, khawvela Oil Palm ching hmasa ber leh lo thatpuitu ram berin a lehlamah environment a tihchhiat dan an hriat chian tawh avanga an bansan mek laia keini ram zimte hian lo buaipui chin tawk kan hriat hi a pawimawh dawn ta hle niin a lang.

India sawrkar chuan “National Mission on Edible Oils-Oil Palm in NE states” a rawn ti leh ta hluai mai a. India ram economy chawikan nana hmalakna pawimawh tak chu a ni ngei ang; mahse, keini Mizoram state, Northeast-ah chuan Oil Palm plantation lama hma la hmasa leh hma la nasa ber hian, he mission hi kan ram leilung mil tawk tura kan lo hmachhawn thiam a pawimawh khawp ang.

Agriculture lama mithiamten, leileta siam theih ram awl hectare 70,000 kan neih thu leh, heng zinga hectare 20,000 vel chu leilet atana kan hman mek thu an sawi thin a. Tuna leilet atana siam theih hectare 50,000 vel hi, Oil Palm chin theihna tur tawk vela ram awihtlan tha a ni. Tuna Oil Palm chin theihna potential area china an chhut hectare 64,791-ah hian Oil Palm-in a khuh chin chu hectare 26,679 (source-agriculture deptt) a ni mek a. Tuna national mission denchhen hian potential area kan neihte hi Oil palm atana ruahman hi a dik ber ang em tih hi ngun taka ngaihtuah a ngai awm e.

Ram dangin an lo tawnhriat tawh, environment tichhetu Oil Palm hi, keini hian lo mikhual dan chintawk kan neih loh chuan, kum tam tak lo la awm tura he ram luahtu tur tuchhuan lo kal zel tur tan hian harsatna namen lo kan lo hnutchhiah palh ang tih hi a hlauhawm hle a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy