Mizoram Governor chuan nimin khan Raj Bhavan-ah agriculture department hotute leh an thawhpui company – Godrej Agrovet Ltd leh Patanjali Foods Limited official te a kawm a, Oil Palm tharchhuah kawnga Mizoram dinhmun thlir hoin Oil Palm chin kawnga tanlak chhunzawm dan tur an sawiho a.
Oil Palm chin kawnga thuthang dik tawk lo vawrh darh a nih avangin mi tam takin Oil Palm chin an bansan nia sawi chungchangah, hemi zirchiang tur hian mithiamte ruat an ni a, March 14, 2022 khan “Study Team for Pilot Research & Study on Oil Palm cultivation and its effect on the environment” tih chu din a ni tawh, tiin nimina Larsap hova thutkhawmah hian tarlan a ni bawk a.
Thawkkhat lai khan Oil Palm chin chungchangah, ram leilung a tichhia, environment a tichhia tiin kawng hrang hranga a that loh dan sawi a ni thin a. Oil Palm thatpui nia sawi khawchhak lam ram Indonesia pawhin, Oil Palm hian ram a tihchhiat nasat avangin tunah chuan an bansan leh tawh; miin an bansan tawh laia lo tharthawh ve chiam hi a fuh zan lo’ ti lam deuh khan thuthang a awm a. Hei hi chu Oil Palm chingtuten Oil Palm ‘zik no’ an zawrh tak chiam chhan kha a ni hranin a lang lo. A chhan ber zawka chu, Oil Palm rate a sang thei lo va, link road a mumal loh avangin a phurh chhuahna leh buaipuina senso nen a rate a intu lo lutuk a, Oil Palm chingtuten hlawkna an têl pha lo a, chuvangin an hlawkpui theihna awm chhun nia an hriat, ‘a zik no zawrh-ah’ an tuan ta mai niin a lang.
Heng thil a thlen chhan ber chu, sawrkar hian kuthnathawktute hi tihtur a kawhhmuhin a hnu lamah hlawkpuina khawpa a vilzui leh tak loh vang leh, a nihna tur anga a facilitate loh fo avangin kawng lakah an chawlhsan leh ta mai thin niin a lang.
Tuna Oil Palm zirchiangtute zirchianna report te pawh hi chiang takin han tlangzarh law law se, kuthnathawktuten ngaihtha taka hma an lak ngamna turin sawrkar hian hma hruai thin se a duhawm hle a ni.
Oil Palm leh zirchianna?
