Oliver Anthony hla thar ‘Rich Men North of Richmond’ chu Billboard Hot 100 (singles) chart No.1-ah a debut a, he chart-a a hmaa a la lang ngai lo, chart-a a vawi khat lannaa No.1-a debut nghal thei hmasa ber a ni. Hetihrual hian Olivia Rodrigo ‘Bad Idea Right?’ pawh top 10-ah invawrh kai ve ta bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian kar khat chhunga all-genre US streaming (official audio leh official video), radio airplay leh sales data te chu tehna pawimawh a ni.
Rich Men North of Richmond hian kar khat chhung stream maktaduai 17.5 leh download sales 1,47,000 a nei thei a, a hla hi radio lamah tilar ve vak loin radio airplay hi 5,53,000 chauh ni mah se streaming leh sales hi chart No.1-ah a debut pui ta a ni.
Oliver Anthony, a laiah hming Christopher Anthony Lunsford hian a stage name-ah a pu Oliver Anthony hming a hmang a, factory a hnathawk thin niin, online atanga lar chhuak a ni. He hla hian fak leh sel a hlawh nasa viau mai a, Anthony chuan a hla a No.1 theihna chhan ni a hriat sawiin, “Chhuan thar te beidawnna leh lungawilohna hi he hlain ngaihven a hlawhna chhan a ni. A hla hrim hrim hi chuan engmah han special-na a nei hran lo, mahse, a support-tu te hian an titha em a, an thawm hi hriatpui ve a phu a ni,” a ti.
Oliver Anthonyhi Billboard chart dang hrim hrimah pawh la lang ngai miah lo a ni a, chutiang a ni chung chuan Hot 100 chart ranking-a a lan vawi khatnaah No.1 a ni nghal thei a, hetiang tithei zaithiam awm chhun a la a ni. Hot 100 chart-a an hla vawi khat lanna a No.1 ni nghal thei hi midang panga- Zayn Malik, Baauer, Carrie Underwood, Fantasia leh Clay Atken te an awm tawh a, mahse, heng zaithiam panga te hi a hmaa Billboard chart danga lo lang tawh leh a, Hot 100 chart-ah pawh group ang te a lo lang tawh an ni.
Oliver Anthony hi eng record label hnuaiah mah la inziak lut lo a ni a, a hla pawh hi ama tihchhuah niin, hetianga record label awmna nei miah lo Hot 100-a No.1 ni thei pahnihna a ni a, hetiang deuh chiah hian 1994 khan Lisa Loeb chuan label awmna neih miah loin a hla ‘Stay (I Missed You)’ a No.1 pui tawh a ni.
‘Rich Men North of Richmond’ Oliver Anthony-a’n amah chauha a phuah a ni a, March-April 2022-ah No.1 thei, Glass Animals hla an frontman Dave Bayley phuah ‘Heat Weaves’ hnua mimal hla phuah he chart-a No.1 ni leh thei hmasa ber a ni a, mimal hla phuah, a phuahtuin a sak nghal ni bawkah chuan January 2018-a Ed Sheeran hla ‘Perfect’ hnua he chart-a No.1 ni leh thei hmasa ber a ni bawk.
Luke Comb-a’n Tracy Chapman hla hlui ‘Fast Car’ a cover chu No.2-ah bawk a awm leh a, chart No.1 hlui Morgan Wallen ‘Last Night’ chu No.1 atangin No.3-ah a tawlh a, tihian chart No.1 atanga No.3 te hi country hla vek an ni a, tum khata Hot 100 chart top three-a country hla a lan vek vawi hnihna a ni.
Taylor Swift ‘Cruel Summer’ chu No.3 atangin No.4-ah a tawlh a, Rema leh Selena Gomez ‘Calm Down’ chu No.4 atangin No.5-ah a tawlh a, chart No.1 hlui Olivia Rodrigo ‘Vampire’ chu No.6-ah bawk a la awm a, Gunna ‘Fukumean’ chu No.5 atangin No.7-ah a tawlh a, Dua Lipa ‘Dance the Night’ chu No.7 atangin No.8-ah a tawlh a, Nicki Minaj, Ice Spice leh Aqua ‘Barbie’ chu No.8 atangin No.9-ah a tawlh ve ta bawk.
Chart top 10 khartu chu Olivia Rodrigo ‘Bad Idea Right?’ niin, stream maktaduai 19.7, radio airplay maktaduai 5.3 leh sales 4,000 tlingin No.13 atangin No.10-ah a invawrh a, Rodrigo hla he chart top 10-a lang thei parukna a ni.
Oliver Anthony ‘Rich Men North of Richmond’ a Hot ber
