Olivia Rodrigo hla thar ‘Drop Dead’ chu Billboard Hot 100 (US singles) chart No.1-ah a debut a, he chart a a hla No.1 kai thei palina a ni. Chart No.1-a debut tih chuan chart ranking-a a lan theihna hmasa bera No.1 ni nghal tihna a ni.
Rodrigo hian a hla ‘Drivers License’ chu January-March 2021 khan kar riat chhung chart-ah a lo No.1 pui tawh a, a hla dang “Good 4 U” chu May 2021-ah kar khat a No.1 a, ‘Vampire’ hla pawh July-September 2023-ah kar hnih chhung a No.1 pui tawh bawk.
Olivia Rodrigo hian a studio album hmasa ber leh a dawttu atanga a lead singles-te Hot 100 No.1-ah a lo debut pui ve ve tawh a, zaithiam zinga chutiang tithei hmasa ber niin, tunah record thar siam lehin zaithiam zinga album hmasa ber, a dawttu leh a pathumna thlenga album tina lead singles chart No.1-a debut pui vek thei hmasa ber leh awmchhun a la ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni. Olivia Rodrigo ‘Drop Dead’ hian April ni 17-a an tlangzarh atanga April ni 23 thlengin stream maktaduai 27.9, radio airplay ngaithlatu maktaduai 23.8 leh sales 45,000 a nei a, chart No.1-ah a debut pui ta a ni.
Olivia Rodrigo, kum 23 hi, kum 2000 hnulama piang zaithiam zinga Billboard Hot 100 chart-a No.1 kai thei hla pakhat aia tam nei thei awmchhun a la ni a, 2000 hnulama piang zaithiam dang, chart No.1-a lang thei hla nei te chu- 2000 a piang 24kGoldn “Mood” featuring Iann Dior (October 2020), 2001 a piang Billie Eilish “Bad Guy” (August 2019), 2002 a piang Jaws 685 “Savage Love (Laxed – Siren Beat)” with Jason Derulo & BTS (October 2020), 2003 a piang The Kid Laroi ‘Stay’ with Justin Bieber (August 2021), 2003 a piang Tate McRae “What I Want” (Morgan Wallen feat. McRae) (May 2025), 2000 a piang Alex Warren “Ordinary” (June 20205) te an ni.
Ella Langley hla hit “Choosin’ Texas” chu kar sarih a No.1 hnuah No.2-ah a tawlh a, a hla dang ‘Be Her’ chu No.5 a kai thar ve leh ta bawk. Heng hla pahnih te hi a No.1album Dandelion ami ve ve an ni.
Chart No.1 hlui Bruno Mars “I Just Might” chu No.3-ah bawk a la awm a, Olivia Dean “Man I Need” chu No.2 atangin No.4-ah a tawlh a, chart No.1 hlui Alex Warren “Ordinary” pawh No.5 atangin No.6-ah a tawlh a, Olivia Dean hla dang “So Easy (To Fall in Love)” chu No.6 atangin No.7-ah a tawlh ta bawk.
Justin Bieber hla ‘Diasies’ chu top 10-ah rawn lang thar lehin, No.18 atangin No.8-ah a invawrh a, Coachella-a a performance avangin Bieber hla leh album te hralh a kal thar leh hle a ni. Daisies hi nikum-a a album tlangzarh ‘Swag’ a mi kha niin, chart No.2 te pawh a lo kai ve zak zak ta a ni.
Chart No.1 hlui HUNTR/X “Golden” chu No.7 atangin No.9-ah a tawlh a, Kehlani “Folded” chu No.9 atangin No.10-ah a tawlh ta bawk.
Olivia Rodrigo ‘Drop Dead’ a Hot ber
