Daily Newspaper

Omicron hritlang khawsik satliah : Adityanath

562

Uttar Pradesh Chief Minister Yogi Adityanath chuan Omicron variant chu ‘hritlang khawsik satliah’ tia sawiin mahse fimkhur taka awm a ngai tiin a sawi.

Naupang kum 15-18 te vaccine pekna hmun Lucknow khawpui a tlawhnaah Adityanath chuan, “Omicron hi inkaichhawn a awlsam zualin a darhchak ngei a, mahse, pandemic leng thawh hnihna nena khaikhin chuan Omicron chu a chak lo zawk hle a ni. Hritlang khawsik satliah a ni mai a, mahse, fimkhur taka awm a ngai a, hlauthawnga phili tur a ni lo,” tiin a sawi.

Adityanath chuan nikum March-April vela leng Delta variant kai te kha chuan that leh nan ni 15-25 vel an mamawh a, an dam hnuah pawh harsatna hrang hrang an tawk a ni, a ti bawk.

“Omicron erawh chutiang a ni ve rih lo. He virus hi a chak lo va, mahse, natna dang nei te chu an fimkhur zual a ngai a ni. Hei vang tak hian sorkar chuan zan curfew a puan phah a ni,” tiin Chief Minister chuan a sawi bawk.

Uttar Pradesh-ah Omicron kai pariat hmuhchhuah tawh an nih thu leh chung zinga pathumte chu dam tawhin midangte chu inah inenkawl an nih thu a sawi bawk.

Kum 15-18 inkar te hnena Covid vaccination programme kalpuiah vaibelchhia 1.4 vel te hnenah vaccine pek a nih tur thu sawiin chumi atan chuan pekna hmun 2,150 an siam thu a sawi bawk.

Professor Manindra Agarwal of IIT Kanpur chuan pandemic third wave chu April thla tawp rualin a reh ang a ti.

Mahse, inthlan dawna rally neih te chu Corona thehdarhna tha ber ber a nih thu sawiin punkhawm tamnaah Covid guidelines zawm a har tiin scientists chuan a sawi bawk.

Prof Agarwal chuan election rally neihnaah te mi tam tak ten guidelines zawm lovin hun an hmang a, chu chu nasa zual zawka inkaichhawn awmna chhan a ni a ti bawk a.

Prof Agarwal chuan mathematical model hmanga hrilh lawkna an siam ang chuan India ramah third wave chu January thlaah thleng tanin March thlaah chuan nitin kaithar 1.8 lakh vel an awm tur thu a sawi a.

“Mahse mi 10 zelah pakhat vel chauh damdawi In panpui ngai an ni ang a. March thla laihawlah chuan khum nuai 2 chuang mamawh a ni ang,” tiin a sawi bawk.

Africa leh India-a mipui 80% te chu kum 45 hnuailam an nih avangin heng ram pahnihah te hian natural immunity chu 80 per cent vel lai a ni tiin a sawi bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy