Daily Newspaper

Omicron inkaichhawn nasa

21

World Health Organization chuan mipuite chu holiday plan an siamte mipui nawlpui himna ngaihtuaha Omicron variant leng darh mekah thulh turin a ngen.

“Thil tihkhawm thulh chu nun chan ai chuan a tha zawk” tiin WHO head Dr Tedros Adhanom Ghebreyesus chuan a sawi a, ‘thutlukna harsa tak’ siam a ngai a ni tiin a sawi.

“Thenkhatah chuan events kan huaihawt turte cancel emaw thulh emaw hial a ngai lo thei lo” tiin a sawi bawk.

Hetihlai hian Omicron chu US ah dominant variant a ni der tawh bawk a. Dr. Tedros chuan Omicron chu Delta variant ai daihin a leng darh chak zawk tiin a sawi bawk.

Ram hrang hrang France leh Germany-te ang chuan Covid kaihhnawiha khuahkhirhna khauh zawka kalpui tawhin hripui leng darh tur dan nan zin veivah nasa takin an khuahkhirh a, Netherlands chuan krismas hun chhungin lockdown a kalpui bawk.

White House chuan thuchhuah a siamah President Joe Biden chuan ‘ram lockdown a tum lo’ tiin a sawi a. US top infestious disease expert Dr. Anthony Fauci chuan American te chu Krismas kaihhnawiha zin veivahin vaccine la kim tawh teah pawh Omicron nasa zawka inkaichhawn a thlen thei tiin a lo hrilh lawk tawh bawk.

US Centers for Disease Control and Prevention (CDC) leh State Department te chuan American-te chu ram pariat tlawh rih lo turin a ti a, chung a tih zingah chuan Spain, Finland, Chad leh Lebanon te pawh an tel a. Hei bakah hian Bonaire, Monaco, San Marino leh Gibralter te pawh Level 4: Very High classification-ah a dah bawk.

Uk Prime Minister Boris Johnson pawhin sorkar chuan England-ah Omicron inkaidarh pun zel vangin rules thar a siam a ngai dawn tiin a sawi a, mahse khuahkhirhna thar kalpui tur erawh a ti lo thung.

London khawpui Trafalgar Square-a New year’s Eve lawmna neih thin chu mipui him zawk nan thulh a nih thu London Mayor Sadiq Khan chuan a puang bawk.

Omicron hi November thla khan South Africa-ah hmuhchhuah niin WHO chuan ‘variant of concern’ ah a puang zui bawk.

Dr. Tedros chuan, “Kan vaiin pandemic hi kan hne tawh. Kan vai hian thiante leh chhungte nena hun hman ho kan duh tawh a, kan vai hian thil pangngai tawh se kan ti a ni” a ti.

“Chu’ng a thlen theih nan chuan kan vai hian hruaitu atanga mimal thlengin thutlukna khirh tak keimahni leh midang te him nan kan siam a ngai a ni” a ti bawk.

“A thenah chuan kan hunpui huaihawt tum te thulh emaw sawn emaw te a ngai dawn a. Tuna kan event huaihawt tumte thulha a hnu lama lawmna neih zawk chu tuna lawmna neiha a hnua lunghnur ai chuan a tha zawk” tiin a sawi.

Dr. Tedros chuan pandemic chu kum 2022-ah kum lai hawlah khawvel mipui 70% ten vaccine an dawn hman chuan a reh tur thu a sawi bawk a ni.

Kum 2019 a China atanga lengdarh Covid-19 chungchangah data leh information pawimawh an neih a ngaih thu sawi bawkin, “He virus chhuahna bul kan hriat ngei a ngai a, hriat tuma nasa zawka kan beih a ngai a, tuna thil thleng atang hian nakina tha zawka kan hmachhawn theih nana tul a ni” tiin Dr. Tedros chuan a sawi bawk.

Davos a World Economic Forum meeting tum thulh
World Economic Forum chuan Switzerland, Davos-a annual meeting neih an tum chu Omicron coronovarisu variant leng avangin an thulh.

He summit hi khawvel ram economy tha ber berte leh corporate leader-te inhmuhkhawmna thin niin nakum January 17 atanga 21 inkar neih tum a ni a. A hun sawn ta in summer tir lamah neih tum a ni ta zawk.

Nikum pawh khan Davos summit chu Covid avangin a hun sawn a lo ni tawh a, a hnuah Singapore-a neih turin an ti leh a, chu pawh chu an thulh zui ta hial a ni.

World Economic Forum (WEF) chuan thuchhuah an siamah pandemic avanga zin veivah khuahkhirh nasat chuan mimal anga inhmuhkhawmna neih a tiharsa em a ni tiin an sawi.

“Hriselna ngaihtuahin leh omicron leng darh mekin zin veivah lamah harsatna a siam nasat avangin loh theih lohin a hun sawn a ngai a, meeting neihna tura mimal tinte hriselna chu Forum-in a dah pawimawh hmasak ber a ni” tiin WEF chuan a tarlang bawk.

Hei vang hian inhmuhkhawmna nei lovin online hmangin global leader te chuan ‘State of the World’ session an nei thung ang a, hetah hian khawvelin harsatna a tawh len ber ber chungchang sawihona neih a ni thung ang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy