District Mission Management Unit (DMMU) Serchhip bultumin Minisitry of Rural Development hnuaia programme kalpui mek, National Campaign on Promoting Digital Transactions at Panchayat Level (digital hmanga indawr tawnna) chungchang inzirtirna leh Serchhip district huap campaign hawnna chu Ningani khan Keitumah buatsaih a ni.
DRDO project director Malsawmtluanga chuan sumfai tel loa thil lei leh hralh leh insumdawn tawnnate lehkha hmang tlem zawnga kal chu Prime minister Narendra Modia ngaihpawimawh a ni, tiin, hun rei tak atang tawhin India ram hmun hrang hrangah kalpui a ni tawh tih a sawi. Mipuiin sum leh hun senga bank-a kal kher loa online digital transaction hrang hrang hmanga indawr a awlsamin a rintlak hle tih sawiin, Serchhip district nuhoten tangkai taka an hman thiam vek theih thil, awlsamna petu tur a ni, tiin a sawi.
Digital transaction awmzia leh nihphung tlangpui inhrilhfiah niin, district chhung khaw hrang hrang atanga self help group member-te chu an thil zir theuhte midang zirtir zel tur leh hmang uar hmasatu ni tura fuih an ni. Internet & mobile banking nihphung leh a hman tangkai dan te, a hmangtute hriat tel tur dan pawimawh leh social assistant hlutna leh thatna awmte ngaihthlak a ni bawk.
Digital transaction inzirtirna hi February 1 atanga August 15 thleng National Rural Livelihood Missions hnuaia khaw thlanbika neih tur a ni a. District level hawnnaah hian Serchhip leh East Lungdar RD Block huamchhunga self help group member-te leh Keitum VC member-te an tel.
Online-a indawr tawn dan inhrilh
