Operation Sindhu hmangin India-in Iran-a a mite hruai haw tan

Operation Sindhu hmangin India-in Iran-a a mite hruai haw tan
India chuan Operation Sindhu tia hming vuahin Israel nen an indo mek avanga Iran-a himna dinhmun hniam mek karah a khua leh tui awmte hruai haw hna a thawk tan a, hetih mek lai hian Israel-in a beihna avangin Tehran-a zirlai awmna dormitory an kah fuhah Indian zirlai an inhliam nia sawina a awm bawk.
Beihpui thlakna hmasa berah hian Tehran-a Indian embassy chuan Iran hmar lama Indian zirlai 110 chu Thawhlehni khan Armenia-ah lirtheiin an luhpui niin external affairs ministry chuan a sawi a. Heng zinga a tam ber hi Jammu & Kashmir-a mite niin Armenian khawpui, Yerevan-ah luhpui an nih hnuah Nilaini chawhnu khan an chuanna tur bik thlawhnain India panpui an ni.
“India sorkar chuan Iran leh Armenia sorkarte chungah tluang taka inthiar chhuah hna thawh a nih theih nana a puihnaah lawm thu a sawi,” tiin thu a chhuah.
Tehran atang hian Qom-ah zirlai 600 vel sawn an ni bawk a. Israeli thlawhnaten tun hnaiah Tehran an kah nasat avangin sawn an ni tih sawi a ni.
External affairs ministry chuan Iran leh Israel inkara inbeihna nasa tak a awm avanga himna dinhmun chhe mek zelah Indian khua leh tuite an him theihna turin a theih dan kawng hrang hrang a dap tih a sawi.
New Delhi-a Iranian embassy chuan Indian telin ram dang zirlai panga chu Israeli thlawhnain kartawpa Tehran-a Keshavarz Street-a damdawi zirlaite dormitory a kahnaah an inhliam niin a sawi a. Dormitory-ah hian Kashmiri zirlai tam tak an awm nia sawi a ni.
“Indian zirlaite an inhliam hnuah hian Iran-a foreign affairs ministry chuan Tehran-a Indian embassy, foreign ministtry leh thuneitu dangte a be nghal a. Thiar chuaha an awm hmun sawnna tur leh kalpui dan tur an ngaihtuah nghal a ni,” tiin Iranian embassy chuan an Telegram channel-ah an tar lang.
Boruak awm dan thlirin Tehran-a Indian-te chu khawpui chhuahsan thuai tur leh kal dan tur pawh dap zung zung tura tih an ni bawk.
Indian external affairs ministry chuan beihpui thlak mekah hian Tehran-a Indian embassy chuan ‘boruak tha lo zel karah ram chhunga Indian-te chu hmun him zawka an awmna tur a dappui a, thiar chhuakin thil kalpui dan tur a dapsak zel a ni’ tih a tar lang.
Iran-a Indian-te hi Indian embassy-in emergency helpline a siam hmang tangkai tura ngen an ni a, New Delhi-ah external affairs ministry-in 24×7 control room a siam bawk.
Iranian thuneituten an chhinchhiahna hnuhnung berah chuan Iran-ah hian Indian 10,000 vel an awm a, a tam ber hi university, professional course leh sakhaw zirna hmuna awma lehkha zirlai an ni.
Israel leh Iran hi kartawp atang khan missile leh drone hmangin khawpui lian deuhva an sipai leh hmun pawimawh bik an inbeihsak nasa hle a. Israel hian Nilaini khan Iran-a hmun 40 kap fuhin ralthuam an siamna hmunte pawh a tel niin a sawi.