Operation Sindoor kan la kalpui, kan inring reng – Army chief

Operation Sindoor kan la kalpui, kan inring reng – Army chief
India leh Pakistan inkar boruak sosang mek karah Indian Army chief General Upendra Dwivedi-a chuan Thawhlehni khan Operation Sindoor chu an la kalpui reng tih sawiin India chu eng thil pawh hmachhawn tura a inbuatsaih reng thu a sawi.
Army chief hian India leh Pakistan inkar chhia awm theiah ‘inbuatsaihin an che vel reng’ tih a sawi a, ‘khawmuala beihpui thlak tur pawhin’ an inpeih tih a sawi.
Hetianga army chief-in a sawi hma lawk, Pathianni khan ram pahnih inrina, Kashmir-a Line of Control (LoC) hrulah Pakistani drone ni ngeia hriat eng emaw zat hmuh a ni a. General Dwivedi-a hian thil thlengte chu chiang takin a sawi lang lo va, union territory-ah hian ‘boruak a tang hle mah se thunun reng a ni’ tih a sawi thung.
Kum tina thuthar lakhawmtute a kawmnaah army chief hian May, 2025 atanga an kalpui, Operation Sindoor pawh an la kalpui reng tih a sawi bawk.
“Kan mit leh beng kan chhi reng a, Operation Sindoor bul kan tan atang khan kan la kalpui reng a, kan inralring reng a ni. He beihpui thlakna hnuaiah hian keimahni lam atang chuan ang anga chet chhuah ngai pawh ni se kan inpeih thlap reng a ni,” tiin Pakistan-in a awp chin Kashmir-a mi firfiakte inkulhna awm chungchang zawhna a chhang.
“Thu kan hriat dan chuan tunah hian camp pariat dawn a la awm niin kan hria a, an la che ve reng bawk a. Heng zinga pahnih hi International Border epa awm leh a dang paruk hi LoC epa awm niin kan hria,” a ti a. Hmun thenkhat hi luahtu an la awm a, training pawh kalpui a la ni reng niin a sawi bawk.
“Eng ang thil pawh rawn thlenin che sela, keini chuan kan tih tum tak angin kan chhang let ve zel dawn a ni,” a ti.
Operation Sindoor hi May, 2025 khan India hian Pahalgam-a mi firfiakte chetna chhan let nana a kalpui a ni a. April 22, 2025 khan Kashmir phaikuama khualzin tlawh hlawh tak hmunah hian khualzin 26 vel kah hlum an ni a, kum 2019-a Pulwama-a sipaite beihna thleng hnua heng lai hmuna mi firfiakte chet nat ber tum a ni.
India chuan Pakistan-a firfiak pawl, Laskhar-e-Taiba peng pakhat, The Resistance Front tihah a puh a. TRF leh Pakistan erawh chuan engmah inrawlhna an nei lo niin an sawi a, India hian sipai chakna hmangin Pakistan leh Pakistan-occupied Kashmir (PoK) a bei zui ta a ni.
Sipai chi thum – Indian Army, Navy leh Air Force chet chhuahnaah hian mi firfiak awmna hmun kua kah chhiat a ni a. Sipai chetna avang hian India leh Pakistan chu ni li chhung indo zuiin LoC leh International Border hrulah chuan power supply tihtawp leh air raid siren tihrik a ni bawk.