Operation Sindoor titawp turin khawi ram hruaitu mahin min nawr lo – Modi

Operation Sindoor titawp turin khawi ram hruaitu mahin min nawr lo – Modi
May 10-a Pakistan nena inbeihnaa inkahhai puan chungchangah Indian Prime Minister Narendra Modi-a chuan Operation Sindoor kalpui titawp tur khan khawi ram hruaitu atang mahin nawrna a dawng lo tih a sawi.
Thawhlehnia Lok Sabha inkhawma Pahalgam-a firfiakte chetna leh Operation Sindoor chungchang sawihonaah Modi-a hian eptute leh Leader of Opposition Rahul Gandhi-a’n US President Donald Trump-a’n India leh Pakistan ramten inkahhai puan kha a rawtna angin an pawm tih a sawi sawi fiah thei lova a puhna a chhang a ni.
A vawi khat nan prime minister chuan, “A tira kan sawi angin kan chet dan kha inepna siam lova chetna a ni a. Khawi khawvel ram hruaitu mahin Operation Sindoor titawp tur khan min ngen lo. May 9 zanah khan US Vice President JD Vance-a’n min biak a tum a. Darkar khat vel min biak a tum a; mahse, sipaite nen kan thutkhawm avangin ka buai hle a. Ka biak let chuan Pakistan-in na taka min beih tumin ruahmanna an siam tih a sawi a. Ka chhanna chu chutiang chu Pakistan tum dan a nih chuan a man chu sang tak an pek a ngai ang tih a ni,” a ti.
“Pakistan-in min beih chuan na takin kan chhang dawn a. Ka sawi kha, ‘Silaimua min beih chuan laipuiin kan chhang ang.’ May 10-ah khan Pakistan-a sipai chakna kan tichhia a, kha kha an chhanna leh kan chin felna chu a ni. Pakistan pawhin India chhanna chu a hnuhnung ber aiin a na dawn tih an hre thiam tawh a. Khatiang thil kha a thleng leh a nih chuan India hian huang a zauh zel thei a. He mipui rorelna temple-ah hian ka sawi duh chu – Operation Sindoor kha a la kal reng a ni,” ati.
Pakistan leh Pakistan-Occupied Kashmir (PoK)-a May 7-a helho hmun beih a nih hnuah khan prime minister hian India tum chu chiang taka tihhlawhtlin a ni tih a sawi a. Pakistan-in mi firfiakte chhan leh hum tuma ke a pen chuan Indian sipaiten kum tam tak an hriat reng tawh tur zirtirna an pe zel dawn tih a sawi bawk.
“May 9 leh 10 khan kan missile-ten of Pakistan kil tin a fuh a, an la suangtuah ngai loh thil a thleng a ni. Kha kha Pakistan chu a thingthittir a, a hnuah Indian DGMO rawn biain, ‘Tawp rawh u. Min bei na lutuk, engmah kan ni tawh lo, khawngaihin min beihna tawpsan rawh u,’ a rawn ti a ni. India chuan May 7-ah khan a tum a tihlawhtling daih tawh a, kha kha sipaite nen inrawna mi firfiakte leh an hotute laka kut kan thlak duhna a ni,” tiin Modi-a chuan a sawi.
May 7-a India-in Pakistan ram chhunga mi firfiakte a beih atanga tanin Islamabad chuan India-ah missile leh drone 1,000 a kap chhuak tih prime minister chuan a sawi a, a zavaiin boruakah tihchhiat a ni tih a sawi bawk.
“Mi firfiakte an tap a, an hitute leh anmahni thlawptute pawh an tap a, mi thenkhatin an sun bawk,” tiin Modi-a chuan a sawi a. Eptuten an beihna a chhannaah hian Congress-in heng chetna an sawi dan hian ram a tihmelhem niin a sawi bawk.
Mi firfiakten April 22-a Pahalgam-a mi 26 an thah hnuah phua lak nan India hian Operation Sindoor hi a kalpui a, hei hi Pakistan chuan chhangin ni li chhung an inkap zui a, May 10-ah inkahhai puan a ni.
Inkahhai puan hi Trump-a chuan vawi eng emaw zat ama rawt anga tih niin a sawi tawh a, India hian engmah a sawi lo va, hei hi eptute chuan insawi fiah tur leh US president thil sawi hi a dik reng em tih leh sorkarin zep a nei em ni tih chu an zawt nasa a, thu dik sawi ngam lo hialah puhin beih nan pawh an hmang nasa hle a ni.