Congress tel lovin BJP te hneh thei turin coalition siam theih a ni lo, coalition party siam a nih pawhin Congress te chuan a lailum an luah ngei ang, tiin senior Congress leader Jairam Ramesh chuan a sawi.
PTI ten an interview-naah Ramesh chuan tunah erawh coaliton party siam tura hma la turin a la hma lutuk ti thungin Congress te ngaih pawimawh ber ni rih chu Karnataka inthlan awm tur leh State hrang hrang te kumina inthlang tur te chu an ni tiin a sawi.
Ramesh-an hetianga thu a sawina chhan hi Mamata Banerjee’s Trinamool Congress (TMC) leh Uttar Pradesh’s Akhilesh Yadav-led Samajwadi Party (SP) te chuan Congress leh BJP te telna coalition-ah an tel dawn loh thu sawiin leh kum 2024 Lok Sabha inthlan awm turah regional party dang te nen thawhho an tum tur thu an sawi vang a ni.
TMC leh SP te thutlukna chuan Opposition unity a tichhe thei ang em tia zawhna chu Ramesh chuan, “TMC, Samajwadi, Third Front tiin an inhmukhawm reng a, Fourth Front pawh siam a ni zui ang a, mahse, Oposition ten thutlukna an siamah Congress an tel ngei a ngai,” a ti a, “Opposition coalition din a nih chuan Congress ten central role an la ang a. Congress tel lovin eng front mah a awm thei lo va. Tunah erawh sawi thui turin a la hma lutuk thung,” tiin a sawi.
A hmasa berah Karnataka inthlan a awm dawn a, chumi hnuah Telangana, Madhya Pradesh, Chhattisgarh, Rajasthan leh Mizoram inthlanin a zui dawn a ni, a ti bawk a. “Kumin hi chuan State inthlanah kan buai nasa dawn a, a hnuah kum 2024 inthlan tur chu kan ngaihtuah thei ang,” tiin Union Minister hlui chuan a sawi bawk a.
“Tunah chuan sawihona leh inhmuhkhawmna kalpui chhunzawm zel a ni ang a. Thrid front kan din ang, fourth front kan din ang a, fifth front pawh kan din mai ang, heng sawihona te hi a kal zui zel a ngai,” tiin a sawi bawk.
Ramesh chuan Congress chak chu opposition alliance tin tana tihmakmawh a ni tia sawiin, mahse, party chuan tunaah chuan Karnataka inthlan chauh a thlurbing a, chumi hnuah State dang inthlan a thlurbing leh ang a ti a. “Kan president Mallikarjun Kharge leh senior leader dang te chuan kum 2024 inthlan kaihhnawiha chet lak dan tur te chu an ngaihtuah mai ang,” tiin a sawi.
Opposition ten Adani issue an buaipuiah TMC te chuan ngawih an chuh a, NCP te pawhin an phurpui lutuk lo chuan Opposition unity a tichhia tia zawhna chu, “Chu chu niin ka hre lo. TMC te hi chuan logic hran an nei a ni thei a, chubak chu sawi duh ka nei rih lo,” tiin a sawi.
Political party 16 te chuan Adani issue ah joint parliamentary committee (JPC) chhuichianna awm ngei se tiin remtihna an pe vek a ni tiin a sawi a. Nationalist Congress Party (NCP) te chuan Enforcement Directorate hnena lehkhathawnah hming an ziah hnan lo chungin min thlawp a ni, tiin a sawi bawk a.
“Party 16-in hming an ziah hnan a, chiang taka ka sawi duh chu Supreme Court committee hi JPC aiawh a ni lo. Supreme Court committee a terms of reference te chu bituk nei a ni a, JPC chuan politico-economic scam te hi a chingchhuak vek thei zawk” tiin Adani issue chungchang chu a sawi bawk.
“Adani tena India leh ram pawna an chetlakna tinreng te hi prime minister malsawmna leh remtihna veka an tih a ni. Supreme Court enpui enquiry lak hian heng issue tin te hi a enfiah vek dawn lo” tiin a sawi bawk a. Congress party te chuan zawhna 93 kan zawt tawh a, 100 na kan belh leh vat ang, tia sawiin Ramesh chuan, ‘Hum Adani ke Hain Kaun’ series Adani issue chuangchanga Prime Minister Narendra Modi laka an kalpui mek chungchang chu a sawi bawk.
Third front din tum tlat chuan BJP te paih thla tura beihnaah chaklohna a siam ang em tia zawhna chu Ramesh chuan tun dinhmunah chuan Congress te chuan JPC demand an thlurbing bur thu a sawi a. “Tun dinhmunah chuan kan aw ten ngaihven a hlawh a, propaganda dik lo thehdarh te, Rahul Gandhi hnuaichhiah tumna leh diriamna te hi kan bei let a, issue dangte chuan min la nghak thei,” tiin a sawi bawk.
Adani issue chu mipui ten an ngaihven takzet ang em tia zawhna pawh Ramesh chuan, “Kan tihtur kan tih a ngai alawm” tia sawiin party te chuan ram pum huapin press conference an neih mek reng thu sawiin tun hnai ni 31 chhungin ni tin zawhna pathum an zawh ziah thu leh an la zawh chhunzawm zel tur thu a sawi bawk a.
“Lok Sabha-ah Rahul Gandhi an a sawifiah vek a, Kharge an Rajya Sabha-ah a sawifiah bawk a. Mahse, an thusawi te chu nawh reh tur an ti a. Chuvang chuan kan tihtur kan tiha kan sawi lan zel a ngai a, hengte hi keini chuan issue pawimawh tawpa kan ngaih a ni,” tiin a sawi bawk.
Congress te chuan liberalisation ring leh duhin private company leh priavte entrepreneur te chu full incentive pek a duh a ti bawk a.
“India economic growth hi private investment in a tihkal tur a ni a, entrepreneurs te, startups tena an tihkal tur a ni a, Congress party ina duh loh chu cronyism, prime minister atanga business group thlanchhuah bik tena duhsakna an hlawh bik a ni,” tiin a sawi bawk.
Congress chuan liberalisation a duh a, control tihtlem zel duhin ramin export a tihchak a ngai a, chumi tur chuan private investment a san a ngai a, mahse, he private investment tihsan hi sorkar mek lai hian a duh lova chu chu airport enkawl tura a pek danah pawh a lang a ni. Sawiho aiin tihbuaiin hun a luah tawh zawk, tiin Ramesh chuan a sawi a, Opposition te chu Adani, China leh economic chungchang pawh sawiho remtihsak an ni lo a ti bawk.
“Parliamentary democracy a fundamental rules pakhat chu opposition te chuan sawi an nei anga sorkar in kal duhdan a nei bawk ang. Lok Sabha leh Rajya Sabh-ah kan tlem zawk tih kan hria a, mahse, sawi kan neih pawh remtihsak loh kan ni,” tiin sawi bawk.
Opp. coalition-ah Congress-in a lailum a luah ngai ti
