February ni 24, Zirtawpni khan Budget Session-ah private resolution pahnih an pawm a, opposition member putluh ve ve a ni. Speaker Lalrinliana Sailo chuan a hriat chinah opposition member putluh resolution pahnih ni khata pass vawi khatna a nih thu a sawi a, member-te inlungrualnaah lawmthu a sawi.
ZLP member Lalchhuanthanga putlut ‘Kawngpui tha leh building tha kan neih theih nan tun aia ulukin hna thawh ni rawh se’ sawihoin an pass a, chumi zawhah Congress member Lalrindika Ralte putluh, raltlante chungchang an pass leh a ni.
Raltlan chungchang hi ‘Kan ram thenawmte atanga sahimna zawnga rawn raltlante hi kan sorkar hian an awmna tur siamsakin duat takin senkawl se, awmkhawmna tur hmun bik ngaihtuahsak rawh se,’ tia putluh a ni a, member-te rawtna angin ‘Kan ram thenawmte Myanmar leh Bangladesh atanga an sahimna zawnga kan unau rawn raltlante Mizoram sorkar leh Mizoram mipuiin tha taka kan lo dawngsawng hi a lawmawm kan ti a, a tul ang zela lo tuamhlawm chhunzawmin an awmna tur leh an mamawhte ngaihtuah zel ni rawh se’ tia tidanglamin an pawm a ni.
Home minister Lalchamliana’n he hunah hian raltlan zat a sawi a, Myanmar atangin mi 31050, Bangladesh atangin mi 458 an awm thu a sawi. Mahse chesawn reng an nih avangin a zat tak hi hriat a har tih a sawi tel.
ID card siamsak an nih thu te, mi sawmhnih khat tih loh chuan ID card hi an nei tawh tih te a sawi a, relief camp 162-ah mi 13540 an awm thu leh camp ni lovah mi 17508 an awm thu sawiin, relief camp ni lova an awm hian an inhlawh theih avangin camp-a awm loh hi an duh zawk tih te a sawi.
“Thu an awih viau mai, kan raltlan unaute hian,” a ti a, Mizoram chu ruihhlo tawlhna kawng a nih thu sawiin, raltlante hi hetiang thilah an inhnamhnawih em tih lo en turin police hotute a chah tih a sawi a, “Mahse tun thleng hian raltlanhiote zinga mi an ni tih hi, man fak tumah kan la nei lo a,” a ti.
Resolution puluttu Lalrindika Ralte chuan, “Kan unaute raltlante’n lo hria se ka duh chu, kan ram rorelna sang berah in chungchang kan ngaihtuah a, a tawp thlengin in tan kan ding dawn a ni tih hi,” a ti.
Opposition member resolution pahnih pawm
![](https://theaizawlpost.org/wp-content/uploads/tap_logo-min-large.jpg)