Site icon The Aizawl Post

Oscar entu an pung

Oscar entu an pung
95th Academy Awards (Oscar) chu nikum nena khaikhin chuan TV lam thlirtu 12%-in an pung a, chutih rualin COVID hmalam boruak nena khaikhin chuan viewer punna hi a la tihtham vak chuang lo. Kumin Oscar khan entu maktaduai 18.7 nei angin an chhut a ni.
Kum eng emawti chhung kha chu Oscar hi TV program entu ngah ber dawttu a ni thin a, Super Bowl chiah a pha lo, an ti thin. 2018 hmalam zawng kha chuan Oscar hian entu maktaduai 30 chuang te a nei thin a, entu a ngah ber tum chu 1998 kha niin, mi maktaduai 55-in an en angin an chhut a ni.
2014-ah khan entu maktaduai 43.7 a nei a, khata tang khan tlakhniam lam a pan ta a, 2018-ah entu maktaduai 26.5 neiin, 2019-ah 29.6 a kai leh a, 2020-ah chuan 23.6-ah a tla leh a, 2021 khan entu a neih tlem ber tum niin, COVID hripuiin min nuai lai a ni bawk a, entu maktaduai 9.85 chauh a nei a, 2022-ah maktaduai 16.6 a kai leh a, hei hi entu a neih tlem ber dawttu niin, kuminah maktaduai 18.7 a kai leh chung pawhin entu a neih tlem lamah pathumna a la ni tho a ni.
Kumin show hi 2017 leh 2018 host Jimmy Kimmel-a’n a host leh a, award semna show-ah hian Rihanna leh Lady Gaga te an perform chung pawhin beisei a la pha thei ta chuang lo. Hetihrual hian television viewership hi thildangah pawh a tlahniam ve reng reng a, hei hi streaming vang niin a lang a, social mediia Instagram, Twitter, Facebook leh YouTube lamah chuan viewer maktaduai 27 vel nei angin an chhut a, Twitter-ah pawh No.1 worldwide trending topic a ni thei bawk.

Exit mobile version