Daily Newspaper

Pa tel lo va nau pawm hnua hmangaihna!

12

Nulat laia ngaihzawng neih a, hmangaih tak mai han tawn fuh te chu nuam ve tak a ni, a hlimawm thin. Mahse, pa tel lo va nau pawm i ni emaw, pasal nei lovin fa i enkawl emaw a nih chuan ngaihzawng neih leh chu a harsa deuh thin. I tlukluh ngamna mipa zawn i chak a ni thei a, chutiang chu i hmu a i tawng a nih chuan a tha hle a ni, mahse, ngaihzawng neih leh chu kan harsat tawh riau thin, kan fimkhur tawh a, kan dawn thui a, a hma ang bawka chetsual leh kan hlau a. Chu chu kan nihdan tur a ni reng a ni.

Single mom ni chunga ngaihzawng nei leh tur chuan eng nge kan tih tak ang? Engtin nge kan tih ang? Relationship lama mithiam ten single mom te tana hriat tur pawimawh ni a an sawi te kan rawn tarlang e.

Ani (mipa) chu i mamawh reng em tih inzawt rawh. Tunlaiah hmeichhe tam tak ‘single’ nih nuam tih zawk an awm. Pasal/ngaihzawng nena inthen hnuah kawppui ka nei tawh miah lo ang, tia rilru siam te pawh kan awm fo ang. Mahse, chutiang rilru chu kan nei a nih pawhin bul han tan thar leh a, hmangaih han tawn leh chakna erawh a bo tak tak chuang lo. Inthen hlimah thil tih nghal buan buan tur a ni lo va, eng nge i mamawh tih kha uluk taka ngaihtuah tur a ni. Pasal neih leh kha i mamawh reng em tih te ngaihtuah la, pasal nei leh kher lo va ngaihzawng satliah neih mai te pawh i thlang zawk reng thei.

Eng nge i duh tihah chiang rawh.Kawppui neih leh i duh a, neih leh i tum a nih chuan, a lak atangin eng chen nge i beisei tur tih kha inngaihtuah lawk ang che. In chhung tizahawm tu, fate enkawlpui tur emaw, i mamawh phuhru tur emaw pawh a ni thei. Eng nge i duh tihah chiang rawh. I duhna chhan leh i duh dan te pawh i hriattir ngei a tha ang. Chu chu a hnua inbuai lohna tur a ni.

I kawppui thar tur chu uluk rawh. Single mom nih a, kan dinhmun a tleu laklawh phei chuan zuam saloha min zuam tawk hi an lo awm ve thei a, chuvangin fimkhur hle a tul. Psychiatrist Dr Ashith Sheth chuan, “Pasal then hnua kawppui atana i melh leh atan tha chu a dinhmun tur inrem fel tawh, mahni kea dingthei a tha. I nihnaah a zahthiam tur che a ni a,thil chin tha lo nei ang chi chu kalsan la, mahnia mawhphurhna la ngam zawng zawk ang che,” a ti. Chutihrualin mipa pumpelh tur chi pawh a sawi a, “Mipa nungchang tladah ho chu pumpelh la, khawdanga awm ngaihzawn pawh a fuh ber lo. Mipa pawisa hman awlsam, a chhan em em pawh awm lo va thilpek hlu leh manto tak tak pek ching che chu an tha vak lo. |awngkam thlum ho pawh pumpelh tur an ni,” a ti a, “A pawimawh berah chuan i fa enkawl pui tur chein mawhphurhna a la duh tak tak dawn em tih kha ngaihtuah ang che,” a ti bawk.

I fa kha nawr hmanhmawh vak suh. Puitling aiin naupang ten chhungte inthen avanga thinrimna leh lungngaihna te hi kalsan an harsat zawk a, chuvangin i nuna mipa thar lo awm tur chu awlsam takin a pawm thei dawn lo tih hriat lawk tur a ni a, pawm tura nawr luih chung chung loh tur a ni. An inhmelhriat theih nan kawng zawng la, an inkawmnel theih dan tur ngaihtuah ang che. Chutihrualin fate lakah engmah zep tur a ni lo va, an hriatthiam tur tawka hrilh ve zel tur a ni.

(THE AIZAWL POST – Phuah Pawlh)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy