Daily Newspaper

Pacquiao leh McGregor inhnek dawn

9

Tum hnih ngawt UFC chawlhsan tawh Conor McGregor chuan boxer langsar a hmachhawn leh thei dawn a, boxer lar leh hlawhtling Manny Pacquiao nen kum 2021-ah an inhmachhawn dawn.

Chhuak hmasa kamah khan Pacman-a’n kum 2021 chhungin inhnek vawi hnih hmachhawn ngei a tum thu kan tarlang tawh a. A khingpui tur pakhat chu boxer pangngai ni lovin, Octagon chhunga insual thin McGregor a ni ngei dawn niin a lang ta. UFC fighter tha, weight then hran pahniha champion kawp thei hmasa ber McGregor hian UFC a chawlhsan vang vang hnuin Boxing a khelh leh tur thu a sawichhuak a, a khingpui tur pawh khawvel hriat lar sa Pacquiao a nih tur thu a sawi tel bawk. Pac-Man a hmachhawn tur thu a sawi hnu lawkah Philipino boxer Pacquiao pawhin kum tharah Conor McGregor nen an inhnek tur thu a nemnghet ve leh ta a, inhnek lian, boruak nei laih tur chu a thleng ngei dawn niin a ngaih theih ta a ni.

Pac-Man leh McGregor te inhnekna tur hi Middle East a nih tur thu sawi chian a ni tawh a, khawi ram berah nge an inhnek dawn tih erawh a la chiang lo thung. McGregor nen an inhnek atanga sum an hmuh tamtak chu coronavirus tuartute tanpuina atana chhunluh a nih tur thu Ring legend office lam chuan an sawi chiang nghal. The Nortorius pawh hi a sum lak luh tur tam tham tak atangin a luangchhuak ve ngei tura ngaih a ni bawk.

Kum 32 mi McGregor hian kum 2017 khan professional boxing match hmasaberah boxer ropui ber ang hiala ngaih, tlawm nei lova a vanglai hmang liam thak Floyd Mayweather lo hnek tawhin, tunah kum 41 mi champion ropui Pacquiao a hmachhawn leh dawn a, tunlai boxing khawvela boxer ropui ber ber pahnih a hmachhawn thei tur chu a tan chawimawina a nih thu a sawi nghe nghe.

Filipino Pacquiao inhnek hnuhnungber ve thung chu July 2019-a Keith Thurman a hneh kha niin, a boxing record chu 62-7 niin, draw vawihnih a nei bawk. Manny Pacquiao-a trainer Freddie Roach chuan a nau Pac-man hian a khingpui tur McGregor hi a awlsam tak a hneh theih a ring hle a. Round hnih chhung leka a hnek tlawm hman der a ring hial. Pac-Man hian kum 2009 khan a khingpui Ricky Hatton chu round hnih chhung lekin a hneh hman a, Ricky Hatton aiin McGregor hi a hneh ngei tura a ngai nghet hmiah a ni ber mai.

UFC Fighter Conor McGregor hi fighter sum siam thiam zet mai a ni a. Boxer lar leh hlawhtling tak Pacquiao a hmachhawn thei a nih chuan sum hlawm lian a hailut leh ngei tura ngaih a ni.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy