Daily Newspaper

Pacquiao leh McGregor innuai ve leh dawn

29

Manny Pacquiao chuan a hneh loh Floyd Mayweather laka lo tlawm ve tawh bawk Conor McGregor nen kumthara an inhnek tur thu a nemnghet a, Zirtawpni zan khan Irishman pawhin hruihrual chhunga boxer a hmachhawn leh tur thu hi a sawichhuak ve nghal chiah bawk.

WBA world champion Pacquiao chuan kumin nipui thawt tirhtea UFC chawlhsan ta McGregor nena an inhnekna tur hmun pawh Middle East lam a nih thu tarlangin, khawi ram nge tih chiah erawh a sawilang tel rih lo.

Ring legend office lam pawhin he inhnek atanga Pacquiao hlawhchhuah tur zinga tamtham tak chu coronavirus tuartute tanpuina atana chhunluh a nih tur thu an sawi ve bawk. Kan hriat thin angin, boxing legend Pacquiao hi Philippines ramah Senator a ni.

Two-weight UFC champion hlui McGregor hian UFC a chawlhsan thu hi kumli chhungin vawithum a puang tling tawh a! Boxing ring lamah a ring a rawlh leh dawn ta a; Zirtawpni zan khan twitter lamah thu leh hla a pholang ur ur a, kumina mixed martial arts a chawlhsan leh chhan pawh sawifiahin, Dana White nen private Instagram message an inthawntawnte thlengin a pholang.

Irishman McGregor hian thu mai bakah hruihrual chhunga boxing a practice vel lai video footage pawh social media lamah hian a phochhuak bawk.

Kum 32 mi McGregor hian kum 2017 khan professional boxing match hmasaberah Floyd Mayweather lo hnek tawhin, tunah kum 41 mi eight-weight world champion Pacquiao a hmachhawn leh dawn a, tunlai boxing khawvela boxer ropui ber ber pahnih a hmachhawn thei tur chu a tan chawimawina a nih thu a sawi nghe nghe.

McGregor-a fight hnuhnungber chu kumin January thla UFC 246-a Donald Cerrone a hneh kha niin, a mixed martial arts record chu 22-4 a ni.

Filipino Pacquiao inhnek hnuhnungber ve thung chu July 2019-a Keith Thurman a hneh kha niin, a boxing record chu 62-7 niin, draw vawihnih a nei bawk.

Tarlan tawh thin angin, August 2017 khan McGregor hi five-weight world champion hlui Mayweather chuan round 10-naah a tuktlawm a, kha bout kha boxing history-a sum tamberna zinga pakhat a ni nghe nghe.

Las Vegas fight-ah khan North America khawmualpuia pay-per-view maktaduai 4.3 tehreng an hralhna atangin pound maktaduai 450 zet an hmuchhuak a, kum 2015 daih tawha Mayweather leh Manny Pacquiao inhnek enna pay-per-view maktaduai 4.6 an hralhchhuah tih loha entu ngah ber a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy