Champhai district khaw pakhata hmeichhe naupang kum 15 mi chu an khuaa an thenawm ami, pafa in an pawngsual thin tih hriat chhuah a ni a, an pafa hian police-in manin thubuai siamsak an ni.
Thudawn danin, he pawikhawihna hriatchhuah a nih dan hi, hmeichhe naupang sikul luhnaa an zirtirtunu chuan a zirlaite chu an thil tawn tawh leh an chunga thil thleng, midang an la hrilh ngai miah loh a hnena sawi duh an neih chuan lehkhaa ziakin thehlut turin a ti a. He hmeichhe naupang hian a chunga thil thleng, a thisen zawmpui a nu leh pa leh a chhungte dang pawh a la hrilh ngai loh, amah chauhin hrehawm ti taka a lo tawrh chu sawina hun remchang nia hria in, a rilru ti tawt a, a nun tihreawmtu hi a puangchhuak ta tih sawi a ni.
Kum 4 mi a nih laiin, an thenawmpa (tuna kum 53) mi in a serh a khawihsak thin dante, kum 9 a nih laiin amah khawihtu fapa (tuna kum 23 miin) a pawngsual tak dante, hemi hnu atang hian an pafaa an pawngsual thin thute hi ziakin an zirtirtu hi a hrilh a ni.
An zirtirtu hian a zirlai naupangin ring tawk taka a chanchin a hrilh hi zirchiangin, hmaichhanah a kawm zui a. Pawikhawihtuten hremna an hmuh theih dan tur ngaihtuahin, an bialtu pastor a hrilh hmasa ber a, vanduaina tawk hmeichhe chhungte nen hma lak dan tur an ngaihtuah ho zui a ni.
He hmeichhia naupang hi pawl 10 zirlai, matric exam hmachhawn mai tur a nih avangin hma lak nghal rum rum chu dikin an hre loa, HSLC exam zawh hnu khan hmeichhe naupang pa hian Champhai Police Station-ah FIR a thehlut a, an pafa hian man nghal niin jail-a dah an ni a, court-in an chungthu a la ngaihtuah zui dawn a ni.
MZP Gen. Hqrs. chuan an zirlaipui vawi tam tak pawngsual a ni chu lungchhiatthlak a tih thu sawiin, pawikhawihtu pafa chu an phu ang tawk hremna pe turin thuneitute a ngen a, hetiang thil hi thleng nawn tawh lo se an duh tih a sawi. ‘Hetiang thil duhawm lo tak, hun rei tak chhung hriatchhuah loh, hai chhuaktu an zirtirtunu hi kan chhuang takzet a ni,’ a ti.
Pafa in kumtling lo pawngsual MZP-in na taka hrem an phut
