Pahalgam beih hnu ni 100 chhungin firfiak 12 that tawh

April 22-a Baisaran Valley-a Pahalgam-a mi 26 thah an nih hnuah Indian venhim hna thawktuten Jammu & Kashmir-a nasa zawkin mi firfiak beihpui an thlak mek zel a. Pawikhawihna a thlen atanga ni 100 vel chhungin mi firfiak lawk tak tak 12 thah an ni tawh.
Pahalgam-a mi beitute Pakistan-in a puih firfiak pawl, The Resistance Front (TRF) nia hriat an ni a. Venhim hna thawktu pawl hrang hrang chuan union territory huam chhungah pawi dang a thlen lohna turin beihpui an thlak zui nasa hle.
Mi an thah zinga paruk chu Pakistani firfiak an ni tih finfiah a ni a, paruk dang erawh tual chhung mi, tun hnaia firfiaka chetnaa inhnamhnawihte an ni.
Beihpui thlaknaa tel mi pawimawh pakhat chuan, “Kan thil tum kan kalpui mekah hian kan thah tawh zat chiah sawi a harsa a, Jammu & Kashmir pumah hian unit hrang hrangin an bitum lai bik theuhvah beihpui an la thlak mek zel a ni,” a ti.
Beihpui thlak meka hlawhtlinna lian zingah Thawhtanni khan Operation Mahadev-ah Srinagar bula Dichigam-ah mi firfiak pathum thah an ni a, an zinga pakhat hi Pahalgam-a pawikhawihtu ngei a ni tih finfiah a ni.
A tukah Poonch sector-ah Operation ShivShakti kalpui leh niin mi firfiak pahnih thah leh an ni bawk.
Venhim hna thawktute chuan Pahalgam-a pawikawihna a thlen hnu lawk atangin hma an la tan niin an sawi a. Kashmir chhim lam, a bikin Shopian leh Pulwama-ah beihpui liantham vawi li thlak tawhin hengte hi a hmaa ramri kâna firfiaka chet tum an awm tih an hriat vang niin an sawi.
May thla laihawl khan beihpui pawimawh pahnih thla a ni a. Shopian-a Keller Forest-ah Lashkar-e-Taiba (LeT) mi pathum thah niin May 15-ah Tral-a Nader-ah firfiak pathum dang thah leh an ni bawk.
Venhim hna thawktute hian India ram chhungah chauh hma la lovin Pakistan nena inrina piah, Line of Control (LoC) pawn lamah pawh chein Operation Sindoor chu May 6 leh 7 khan an kalpui.
Hemi tum hian Pakistan leh Pakistan-occupied Kashmir (PoK)-ah mi firfiak tawmna pakua tichhiain firfiak 100 chuang thlawhna leh lei atanga an beihnaah an thi a. An beih hmunte hi Kashmir-a pawikhawih tura lut rute awmna thin hmun a ni.
Pahalgam-a firfiakte chet hma khan Indian hnu chhuitute chuan PoK-ah hian firfiak tawmna 42-ah firfiak 110–130 vel an awm thu an sawi a. Kashmir phaikuamah firfiak 70–75 vel leh Jammu, Rajouri leh Poonch-ah 60–65 vel an awm niin an hre bawk.
Beihna thlen hnu ni 100 chhungin Pakistani firfiak paruk thah an ni tawh a, hlauhawm pawh ziaawm hret tura ngaih a ni.
Venhim hna thawktute hi district hlauhawm deuh, a bikin Kashmir chhim leh Rajouri leh Poonch-a ramri hnaihah an la fimkhur hle tho va. Army, Jammu & Kashmir Police leh intelligence unit-te chu an la patrol reng.