Daily Newspaper

Pahnihnaah Inter Milan

11

Inrinni zana Italian Serie A khelhah Lukaku leh Sanchez goal thun hmangin Inter Milan chuan si thum faiin Genao an hneh a, pahnihnaah an inhlangkai. Inkhel dangah Napoli leh Parma an chak ve bawk.

Sanchez chetha zel
Team lian Inter Milan hian beisei phak loh chang nei bawk mahse an insiamtha a, an khel tha chho tan hle. United atanga an hawh Alexis Sanchez chuan siamtharna a chang a, a chetha zui zel. Sanchez khelh that hi Inter Milan pawh hian an chhawr tangkai hle a, hmasawn zelin pahnihnaah an inhlangkai hial tawh.

Inter Milan hian khualmualah Genoa an hmachhawn a, khualmualah nghet taka inlan in, goal thum an thun a, goal an chhuah lo. He inkhelah hian minute 34-naah Cristiano Biraghi cross atangin Romelu Lukaku chuan a tauh goal a, hmahruaina goal a thun. Lukaku goal thun hmang hian hun rei tak chhung si khatin hma an hruai a, hun tawp dawn hnaihah goal hnih an thun belh leh thei hram chauh.

Minute 82-naah tunhnaia chetha Alexis Sanchez chuan hma an hruaina tizau turin an goal hnihna a thun. United leh Inter Milan-a hnawng hman Sanchez hi Inter hian a ngheta lak luh an duh ta hial a, nipui bazar inhawn hunah an lak luh fel nge nge a rinawm. Sanchez goal thun hnu hian minute 90+3-ah goal hmahruai thuntu Lukaku chuan an goal thumna a thun zui leh a, khualmualah si thum faia hnehna changin point thum an hlawhchhuak a, pahnihnaah an inhlangkai. Inter Milan hian an hmahruaitu Juventus chu point liin an la phak lo va, nizan khan Juventus hian Sampdoria an hneh a nih chuan Serie A-ah an champion chiang tawh dawn thung.

Lukaku record thar
Manchester United atanga Inter Milan zawmtu Lukaku a chetha zel a, season kal mekah Serie A-ah goal 15 a thun tling tawh. Kum 70 chhung zet chu Inter Milan player zingah season khat chhunga khualmual goal 15 thun tling thei an awm tawh lova, hun rei tak hnuah Lukaku a rawn inlan ta hlawl a ni. Inter Milan tan season khat chhunga khualmuala goal 15 thun tling thei hnuhnung ber chu Stefano Nyers a ni a, Lukaku hian a rawn nih rual ta a ni.

Inrinni zan khan Serie A team lian zinga beisei phak lo Napoli chuan an mualah Asssuolo an mikhual a, si hnih faia hnehna changin Europa League khelh phak an beisei chhunzawm zel.

Pasarihna ni mek Napoli tan hian Elseid Hysai chuan minute 8-naah hmahruaina goal a thun a, hun tawp dawn tep minute 90+3-ah Allan chuan an goal hnihna a thun ve leh bawk. Season liam ta khan top 4 huang luahin, champions league an khel phak a, last 16 hial an thleng thei. Season kal mekah erawh beisei an phak lo hle thung a, pasarihna ni mek in, an chunga mi AS Roma leh Lazio te aiin an khel tam zawk hial bawk.

Inkhel dangah 10-na luah mektu Parma chuan khualmualah tlahniam chiang tawh Brecia an hmachhawn a, Matteo Darmian (59′) leh Dejan Kulusevski (81′) te goal thun hmangin 2-1 in an chak ve bawk

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy