MNF sawrkarin Aizawl khawpui traffic jam tih rehna atana a tih, PAHOSS hnuaia parking house siamna hmun tam zawk thlirin a tum ber hi a tihhlawhtlin a rinawm loh tih ZPM Thalai chuan an sawi.
ZPM Thalai Hqrs thuchhuak chuan, PAHOSS hmanga Aizawl khawpui hmun hrang hranga parking house sak an tlawhnaah parking house satute hian an sa tha thawkhat niin an hria a, lawmawm an tih rualin, Aizawl khawpui chhunga traffic jam tihziaawmna tura ruahman ni si, a tam zawkah chuan a sakna hmun leh vengin a zir lo hle nia an hria thu a sawi. ‘Sum tam tak hmanna PAHOSS hmanga parking house sak tam zawk hi chuan Aizawl khawpui traffic tawt hi a chhawk zangkhai theih a rinawm loh,’ a ti.
PAHOSS sum dawng, hmang dik tawk lo an awma hremna mumal siam turin thuneitute an phut tih sawiin, chutiang a nih loh chuan PAHOSS hi tute emaw induhsakna leh a tum thelhin, in sak tanpuina satliahah a chhuak ang tih an hlau tih a sawi. ‘Dan mumal awm lo hnuaiah PAHOSS sum dawng, a nihna tur taka hmang loa la tipuitling lo te hi sawrkar hian ngawihbo pui mai a tum em ni, tih hi kan zawhna a ni,’ ZPM Thalai chuan an ti.
PAHOSS hmanga parking house sak mek leh sak zawh tawh an fannaah, parking house sak mek, a then chu first installment dawnga a dang dawn chhunzawm ta lem lo an awm nual tih an hmuh thu ZPM Thalai hian sawiin, MNF sawrkar term tawp dawn thlenga PAHOSS sum la dawng kim lo an awm chu sawifiah tura sawrkar an phut thu leh ruahmanna felfai zawk neia kalpui tura an ngen thu a sawi a ni.
PAHOSS-in traffic jam a chhawk nep ang – ZPM Thalai
