Pak PM leh sipai lalin Trump-a hmu mai thei

Pak PM leh sipai lalin Trump-a hmu mai thei
Pakistan Prime Minister Shehbaz Sharif-a leh Chief of Army Staff Field Marshal Asim Munir-a chuan kerleh hian US President Donald Trump-a an kawm dawn nia sawi a ni.
Pakistani hruaitu pahnih hian karleh Ningani hian Trump-a hi UN General Assembly-a an hmu dawn niin Pakistan-a Khyber News chuan an thu dawn an tar lang.
An inkawmna turah hian thil hrang hrang an sawi dawn a, Pakistan-in tui lian nasa tak an tawrh atanga Israeli-ten Qatar an beih thlengin an sawi dawn niin an tar lang a. New Delhi leh Islamabad inkara khi zau tak awm pawh Trump-a ho hian an sawi dawn niin tar lan a ni bawk.
Hetih lai hian Inter-Services Public Relations emaw, Washington-a Pakistani embassy lamin emaw an inbiak tur thu hi an la sawi rih lo ve ve a; mahse, tun hnaiah Munir-a hian inkar hlat lo takin Washington a tlawh ngei tih chu hriat a ni.
US-Pakistan inkar hi hun rei tak a that loh hnuah June thla khan Trump-a hian Pakistani army chief Munir-a hi White House-ah mikhualin sumdawnna, eibara hmasawnna leh cryptocurrency an sawi dun.
A hnu lawk, July thlaah Trump-a sorkar hian Pakistan nena insumdawn tawnna an kalpui tur thu a puang a, Washington chuan Islamabad-in ‘tuialhthei tam tak’ a neih hai chhuahnaah a pui danw tih a puang bawk..
US-Pakistan inkar hi May thlaa India nen an intihbuai tuma inkahhai a awm theih nan Trump-a’n a pui nia Islamabad-in a sawi hnuah a tha tan a. US President hian Asian-a inthenawm ram pahnih, nuclear ralthuam nei ve ve inkara indona chhuak hi an tawp lo a nih chuan sumdawnna leh chhiah lak hmanga hrekah a vau avangin indo an titawp niin a sawi a, India erawh chuan Trump-a a inrawlh nia a insawi hi a pha nasa hle.
Islamabad hian Director General of Military Operations (DGMO)-in India-a sipai lalte a dawr hnuah inkahhai puan a nih thu a sawi tho bawk a; mahse, a hnuah Washington hmalakna angin a sawi leh a ni.
Munir-a hi August thlaah Washington-ah kal lehin Centcom Commander General Michael E Kurilla-a thlahnaah leh amah thlaktu, Admiral Brad Cooper lawm luhnaah a tel leh a. Hemi tum tho hian Chairman Joint Chiefs of Staff General Dan Caine pawh a kawm.
Tun hnaiah Islamabad hian US atangin $ maktaduai 500 sum thawhna tur a pawm bawk a, he sum hi Pakistan-a ram leilung hausakna hai chhuahna atana hman tur bik a ni.