Pak sorkar puihnain India-in a tihchhiat Lashkar hmunpui sa tha mek

Pak sorkar puihnain India-in a tihchhiat Lashkar hmunpui sa tha mek
Operation Sindoor laia Indian Air Force-in Pakistani firfiak pawl, Lashkar-e-Taiba hmunpui an chhut chhiatsak vek chu sorkar puihna nen tun din leh mek niin Indian venhim hna thawktuten an chhuina leh he mi chungchang hriaten an sawi.
Muridke-a Markaz Taiba complex hi IAF hian May 7 khan Operation Sindoor kalpui hmangin an chhu chhia a. He hmun hi acre 1.09-a zau niin training-na hmun, ralthuam chhekna leh commander chenna hmunte a awm.
A hmun chhia hi sak that leh turin August 18 atang khan excavator panga hmang thiah hna thawh tan niin September 7 khan an zo va. A hnawkte pawh thianin a hmun ngaiah hian a thar sak hna thawh tum mek a ni tih thu an hria.
Sak that hna hi a hmun dirctor Maulana Abu Zar leh commander Yunus Shah Bukhari bakah Lashkar hruaitute pawhin an enpui niin an thu dawnna chuan a sawi a. February 5, 2026-ah chuan thenkhat din fel hman an tum a, kum tina an neih thin, Kashmir-te bitum bika jihad convention hman hman an tum a ni.
India-a venhim hna thawktuten an lo chhut lawkdan chuan May-a buaina a chhuah hnuah khan Pakistani sorkar chuan vantlang hriatah hel pawlhmun tihchhiatte chu tung ding leh tura an puih tur thu a lo puang tawh a. Islamabad hian Lashkar hnenah August 14 khan Pakistani rupee vaibelchhe 40 (Rs. vaibelchhe 12.5) an pe a ni.
“Offline leh online-in a tun din lehna tur an khawn bawk a, an mite pawhin a chhut chhiat leh senghawi hnaah hian an thawk a ni,” tiin thu dawnna chuan a sawi a. “Sum khawn chhuahte chu hmunpui leh camp chhe dang siam that lehna atana ruahman vek a ni,” a ti.
Tun hma pawhin sorkar leh Lashkar inpuih tawnna hi a lo thleng tawh thin a. Kum 2005-a Pakistan-a lirnghing avanga chhiatna nasa tak a thlen tum khan Lashkar hian mi chhawmdawl nan sum vaibelchhe tel a khawn chhuak a; mahse, 80% vel zet erawh an hmunhma tihchangtlun nan an hmang vekl thung nia hriat a ni.
An hmunpui chhut chhiatsak an nih hnuah Lashkar hian an inkulhna an sawn lailawk a. Training-na leh an mi pawimawhte chenna chu Bahawalpur-a Markaz Aqsa-ah an sawn a, July thla khan Patoki, Kasur district-a Markaz Yarmouk-ah an sawn leh bawk.